Ерөнхийлөгч У.Хүрэлсүх Улсын ерөнхий прокурор Б.Жаргалсайханыг улираан томилох асуудлын намын бүлгүүдэд танилцуулсан билээ. Уг асуудлаар зарим гишүүдийн байр суурийг тодруулж байна.

УИХ-ын гишүүн О.Амгаланбаатар:

-Миний хувьд энэ хүнийг улираан томилохыг дэмжиж байна.

Өнгөрсөн 30 жилийн түүхийг харвал улсын Ерөнхий прокурор хүн ийм тийм хэрэг дарлаа гэх мэтээр маш олон мэдээлэл гарч байсан. Гэтэл энэ хүн ямар нэгэн хэл аманд оролгүй ажилласан. Тэр талаасаа бол зарчимтай хүн юм байна гэж ажиглагдаж байгаа. Мөн хуульчдын дунд хуулиа барьдаг хүн гэж яригддаг.

Манай улсад гарсан олон хэргүүдийг шийдэхгүй байна гэх хэл ам бий. Хэрэг бүр явж явж шүүх дээр шийдэгддэг. Шүүх таслан сэргийлэх арга хэмжээ авдаг. Шүүх прокурор хоёрын эрх мэдлийн асуудлыг ялгаж ойлгох хэрэгтэй. Хэргүүд шүүх дээр очоод замхраад байгаа болохоос прокурорын байгууллага хангалттай сайн ажиллаж байгаа гэж би ойлгодог. 

Манай Говь-Алтай аймагт шүүх, прокурор хоёр нэг байранд байдаг. Ашиг сонирхлын зөрчил үүсэх учраас салгаж байрлуулах ёстой гэв. 

---