УИХ-ын гишүүн Б.Энхбаяр Сангийн сайд Б.Жавхланг "Сейфээс нь 7.5 тэрбум төгрөг гарч ирсэн С.Батдөлтэй холбоотой" гэж мэдэгдсэн. Тэгвэл Сангийн сайд Б.Жавхлан "Б.Энхбаяр гишүүн энэ асуудлаа нотол. Юунд хорсоод ингэж байгааг гайхаж байна. Намайг холбож намайг харлуулах гэж байгаа бол ёстой амжихгүй шүү" гэх байр суурийг илэрхийлсэн.

Харин ШШГЕГ-ын дарга Б.Нандинболор “Гэртээ 7.5 тэрбумыг хадгалж байсан С.Батдөл гэгч 7.4 жилийн ял шүүхээс авсан. 2024 оны есдүгээр сарын 29-ний өдрөөс эхлэн Төр хурахын аж ахуйн тооцоот үйлдвэрийн газарт галчаар 1 сар 20 хоног ажилласан. Ингээд прокурорын тогтоолоор буцаад хорих 409-р ангид ялаа эдэлж байгаа” хэмээн мэдээлсэн юм.

УИХ-ын гишүүн Б.Энхбаяр:

-Хоригдлыг галч болгож амраасан байна. Амралтын газар галч хийдэг хоригдол байдаг юм уу. Сангийн сайд Б.Жавхлангийн сонгуулийн ерөнхий менежер нь ямар хүн байсан бэ. Тэр хүн С.Батдөлийн хамаарал бүхий хүн байна уу шалга. Улс төрийн хүрээнд хэнийг ямар албан тушаалд хэн лоббидож томилсон бэ гэдэг мэдээллүүд байдаг. С.Батдөлийг Б.Жавхлан авчирсан гэж улс төрийн хүрээнд ярьдаг.

“Бортээг” ордын нүүрс худалдан авах монопол гэрээний арван хувийг Б.Жавхлан сайдын хамаарал бүхий компани оролцож авсан байна. Ингэхдээ “Эрдэнэс тавантолгойн” хоёр удаагийн тендер зарласныг цуцалж, гурав дахь удаа Сангийн яаманд уг тендерийн маргаан шалгагдаж байх үед Б.Жавхлан сайдын хамаарал бүхий компани нэмэлтээр орж ирсэн. Тэгэхдээ 10 хувийг нь авсан. Энэ сэжиглэх асуудал. Шинжээчийн дүгнэлтэд энэ тухай баримт нь дурдагдаж, Б.Жавхланг гэрчээр дуудсан. Б.Жавхлан орж ирж шинжээчийн дүгнэлтийн өөртэй нь холбоотой хэсгийг сонсчихоод гараад явсан. Шинжээч ноцтой дүгнэлт хэлж байхад нэр цэвэр юм бол яагаад тайлбар хэлэхгүй гараад явчихаж байгаа юм гэв. 

---