"Д.Цогтбаатар гишүүнтэй холбоотой Дээд шүүхийн шийдвэр манай байгууллагад ирмэгц УИХ-д мэдэгдэл хүргүүлнэ. Түүнчлэн С.Батдөл гэх хоригдол хорих 409-р ангид ялаа эдэлж байгаа" гэж ШШГЕГ-ын дарга Б.Нандинболор хэлж байна.

ШШГЕГ-ын дарга Б.Нандинболор:

-УИХ-ын гишүүн Д.Цогтбаатартай холбоотой шүүхийн шийтгэх тогтоол ирээгүй. Ирсэн тохиолдолд шүүхийн шийдвэрийг албадан гүйцэтгэх үүрэгтэй. Хорих ял оногдуулсан тохиолдолд цагдаагийн байгууллага шүүх хурлаас шууд гаргаад манай мэдэлд тухайн этгээдийг авчирч өгдөг. 

Харин Д.Цогтбаатар гишүүний тухайд хорихоос өөр төрлийн ял оногдуулсан юм билээ. 20 сая төгрөгөөр торгох, төрийн болон нийтийн албан тушаал ажиллахыг нь тодорхой хугацаанд хориглосон. Бид шүүхийн шийдвэр гарсны дараа албан үүргээ гүйцэтгэнэ. Хуулиараа манайд шийтгэх тогтоол ирсний дараа УИХ-ын Тамгын газарт мэдэгдэл хүргүүлэх юм билээ.

С.Батдөл гэдэг хүн 7.4 жилийн ял шүүхээс авсан. 2024 оны есдүгээр сарын 29-ний өдрөөс эхлэн Төр хурахын аж ахуйн тооцоот үйлдвэрийн газарт галчаар ажиллаж байсан. С.Батдөл 1 сарын 20 хоног галчаар ажилласан. Ингээд прокурорын тогтоолоор буцаад хорих 409-р ангид ялаа эдэлж байгаа.

Манай Шүүхийн шийдвэр гүйцэтгэх газрын төсөв хоёр дахин нэмэгдсэн гэдэг асуудал дээр тайлбар өгье. Манай албан хаагчдын цалин хөлс 48.9 тэрбум төгрөг, дулаан цахилгаан гэх зэрэгт 4.5 тэрбум төгрөг, хоригдол ялтны хоол хүнсний зардалд 3.4 тэрбум төгрөг нэмэгдсэн байгаа гэв. 

---