УИХ-ын гишүүн Б.Энхбаяр Сангийн сайд Б.Жавхланг "Сейфээс нь 7.5 тэрбум төгрөг гарч ирсэн С.Батдөлтэй холбоотой" гэж мэдэгдсэн. Тэгвэл Сангийн сайд Б.Жавхлан "Б.Энхбаяр гишүүн энэ асуудлаа нотол. Юунд хорсоод ингэж байгааг гайхаж байна. Намайг холбож намайг харлуулах гэж байгаа бол ёстой амжихгүй шүү" гэх байр суурийг илэрхийлжээ. 

УИХ-ын гишүүн Б.Энхбаяр:

-Сейфээс нь 7.5 тэрбум төгрөг гарч ирсэн С.Батдөл Төр хурахын амралтад амарч байна. Мөнгө барьдаг сайд Монголд ганцхан байдаг. С.Батдөл чинь Дарханы хүн гэсэн биз дээ. АТГ-ын дарга З.Дашдаваад хэлсэн, эзнийг нь шалга гэж. Тэр хүнийг амраагаад байна гэдэг чинь шагнал биз дээ. Тийм их мөнгөний асуудалтай хүн чинь амралтын газар амраад байна гээд хүмүүс хэлж байна. Шүүхийн шийдвэр гүйцэтгэх газрынхан тэр хүнийг амралтад байлгасан байна. Шүүхийн шийдвэр гүйцэтгэх газрын төсвийг 2025 онд хоёр дахин нэмсэн. Сангийн сайд яагаад Шүүхийн шийдвэр гүйцэтгэх газарт ийм их хайртай болчихсон юм бэ...

Сангийн сайд Б.Жавхлан:

-Б.Энхбаяртай мөр зэрэгцэн ажиллаж байсан. Засгийн газрын гишүүний зовлон жаргалыг маш сайн мэдэх хүн ингэж ярьсанд харамсаж байна. Юунд хорсоод яваад байдгийг нь гайхаж байна. Сэдэв болгон дээр над руу дайрч байгаа. Гэхдээ тэвчээрт хязгаар байгаа. Төсвийн ерөнхийлөн захирагч байсан хүн шүү дээ. Тэр харьяа байгууллагын төсөв хэрхэн нэмэгдсэнийг мэдэхгүй байна. Төсөв нь нэмэгдээд үйл ажиллагааг нь сайжирч байвал сайн баймаар юм.

С.Батдөл гэдэг залуу Дарханы харьяалалтай. Ээж, аав нь манай намын ахмад гишүүд. Түүнээс болж намайг холбож намайг харлуулах гэж байгаа бол ёстой амжихгүй шүү. Б.Энхбаяр гишүүн ээ, энэ асуудлаа нотол гэж хэлье гэв. 

---