УИХ-ын чуулганы хуралдаанаар АТГ-ын дарга З.Дашдавааг улираан томилох асуудлыг хэлэлцэж байна. Энэ үеэр нүүрсний гэх тодотголтой хэргийн асуудал хэрхэн шийдвэрлэгдэж байгаа талаар тодруулав. 

УИХ-ын дэд дарга Б.Пүрэвдорж:

-Нүүрсний хулгай 44 их наядын хохиролтой гэдэг үнэн. 2019 оноос өмнө Цагаанхад Ганцмодны хооронд нүүрс тээвэрлэхэд 3 сая төгрөг байсан. Харин энэ мөнгө ковидын үед 120 сая төгрөг болсон. Ингээд хулгай хийсэн. Өдөрт 600 машин 120 сая төгрөгөөр нүүрс зөөхөд 44 их наяд төгрөг найман сарын хугацаанд хийнэ. Үүнийг дээр дооргүй хамтраад хийсэн. Иймд нүүрсний хулгайн асуудалд яаж шийдвэрлэж байна вэ? Эрх баригчид хэт их авлигалжуулж байна. С зөвшөөрөлтэй холбоотой асуудал бас байна. Бүтээмжийн менежерийн асуудлыг хүмүүс бас шүүмжлээд байна. Гэтэл Гашуунсухайтын төмөр зам дээр 950 хүн ажилладаг. Долоо хоногт ганц тээвэр хийдэг. Тэр их хүмүүсийн 180 хүн нь төв оффист захиргаа дээр ажилладаг. Ийм л замбараагүй. Сонгуульд ажилласан бүхий л хүмүүсээ төрийн өмчийн компанид тавьдаг. Ийм л схемийг хийсэн. Тийм учраас бүтээмжийн менежерийг тавьж болж бүтэхгүй байгаа зүйлсийг бидэнд мэдээлэх хэрэгтэй. Засгийн үйл ажиллагаанд дэгээ тавихыг оролддог МАН-ын гишүүд байна.

АТГ-ын дарга З.Дашдаваа:

-2022 онд нүүрсний гэх тодотголтой хэрэг гарсан. Энэ хэргийг шалгах хамтарсан ажлын хэсэг гараад ажиллаж байна. Нийтдээ 103 хэрэг бүртгэлтийн хэрэг нээж шалгаж 17 хэргийг шүүхэд шилжүүлж 14 хэргийг хэрэгсэхгүй болгож, 44 хэрэгт шалгалтын ажиллагаа үргэлжилж байна. Шүүхээр шийдэгдсэн хэргийн тухайд улсад 34 тэрбум төгрөгийн хохирлын нөхөн төлүүлж, 11 тэрбум төгрөгийн хөрөнгийн битүүмжилсэн байна. Мөрдөн шалгах ажиллагаа үргэлжилж байна гэв.

---