“Хөгжлийн банк”-ны хэрэгт холбоотойгоор УИХ-ын гишүүн Даваагийн Цогтбаатарыг чөлөөлөх нөхцөл бүрдээд буй. Гэвч Д.Цогтбаатартай холбоотой шүүхийн шийдвэрийг УИХ хэлэлцэх боломжгүй гэх байр суурийг УИХ-ын Хууль зүйн байнгын хорооноос өгөөд байгаа юм.

Харин УИХ-ын гишүүн Д.Цогтбаатарын хувьд “Улсын Дээд шүүхийн шийдвэрийг хүлээн зөвшөөрөхгүй, Ерөнхий шүүгчид гомдол гаргасан” гэх байр суурийг илэрхийлэв.

УИХ-ын гишүүн Д.Цогтбаатар:

-Миний дээд албан тушаалтнуудад нөхцөл байдал өөрөөр үйлчилсэн. Надад мөн өөрөөр үйлчилсэн учир би гайхаж байна. Улмаар УДШ-ээс гарсан бичгийг очиж аваад, шүүхийн шатанд гомдол гаргахаар материал бүрдүүлж, өмгөөлөгчдөө өгөх ёстой учраас шүүхийн шийдвэрийг очиж авсан. УДШ-ийн шийдвэрийг очиж авснаараа надад холбогдуулсан гэмт хэргийг хүлээн зөвшөөрч байгаа гэсэн ойлголт байхгүй. Үндсэн хууль зөрчсөн, өргөсөн тангаргаасаа няцсан хүнийг УИХ-ын гишүүнээс нь эгүүлэн татахыг хуульд заасан байгаа. Би Үндсэн хууль зөрчөөгүй.

---