Засгийн газрын хуралдаанаар төрийн хэмнэлт, бүтээмжийн зөвлөлийн үйл ажиллагааг эрчимжүүлэхээр шийдвэрлэсэн талаар Хяналт, үнэлгээний Үндэсний хорооны дарга Э.Одбаяр мэдээлэл өгөв.

Хяналт, үнэлгээний Үндэсний хорооны дарга Э.Одбаяр:

-Төрийн хэмнэлт, бүтээмжийн зөвлөлийн үйл ажиллагааг эрчимжүүлэхээр шийдвэрлэлээ. Зөвлөлийн 70 хувь нь хувийн хэвшил, төрөөс бол миний би болон Н.Учрал, Ц.Баатархүү, Л.Энх-амгалан нар орж бүрэлдэхүүн нь шинэчлэгдлээ. Төрийн хэмнэлтийг салбар бүрд эхэлье, бүтээмжийн нэмэгдүүлэх чиглэлд дорвитой ажлууд хийе гэж зорьж байна. Хувийн хэвшлийнхэнтэйгээ хамтарч ажиллана. Засгийн газрын 1111 төв иргэдэд нээлттэй ажиллана. Дөрвөн сайд хэвлэл мэдээлэлтэй ойр ажиллаж, хэмнэлтээ хаанаас эхэлж, бүтээмжээ хаана нэмэгдүүлэх тал дээр анхаарна гэж бодож байна.

Засгийн газар процессын дахин инженерчлэлийн ажлыг хийдэг. Хуучин нэршлээр ажлын байрны зураг авалт гэдэг. Энэ нь давхардсан үүрэг чиглэл бүхий ажлын байруудыг харна гэсэн үг. Өнгөрсөн хугацаанд бүх салбар яам дээр хийгдэж чадаагүй байгаа. Үүнийг эрчимжүүлж хийнэ. Түүнчлэн иргэдийн зүгээс хаана хүндрэл учирч, төрийн алба хаагч хүнд суртал гаргаж байгаа мэдээллийг авч, бодит шийдэл гаргана. Олон зөвшөөрлийн ихэнхийг цахимжуулж, хэмнэлтээ төр өөрсдөөсөө эхэлнэ гэв. 

---