Ноорог.мн сайтын оффист өнгөрсөн шөнө хойшлуулшгүй ажиллагаа явуулж, ажлын хэрэгсэл, хард, гар утас гэх мэт зүйлсийг хураажээ. Тус сайтын ажилчдаас өчигдөр оройн 10 цагаас өнөөдөр өглөөний 5 цаг хүртэл мэдүүлэг авсан аж. Уг үйл явдалтай холбогдуулан Ноорог агентлагаас мэдээлэл хийлээ.

Ноорог сайтын гүйцэтгэх захирал О.Уламсайхан:

-Хойшлуулшгүй ажиллагаа мэтийн маш олон шинэ үгтэй танилцлаа. Тухайн сэжигтэн оргон зайлах, нотлох баримтаа нуун дарагдуулах зэрэг магадлалтай үед л хэрэглэгддэг ойлголт юм байна. Гэтэл бид цэргийн баярын урд өдөр ажил дээрээ компьютер тоглоод л сууж байсан. 21.00 цагийн үед бидний байршлыг хэн нэгэн тодруулж асуугаагүй мөртлөө шууд мэдэж ирсэн. Бидний утас, техник хэрэгслийг хурааж авсан. Одоог хүртэл гар утас болон техник хэрэгслийг буцааж өгөөгүй байна.

Бидэнд анх хуулийн үндэслэлээ огт танилцуулаагүй. Эрүүгийн хуулийн 19.9.1 буюу Үндэсний эв нэгдлийг бусниулсан гэсэн шалтгаанаар шалгаж байна гэсэн. Биднийг өмгөөлөгчтэйгөө уулзуулах боломж олгоогүй. Айлгах ажиллагаа гэж харж байгаа.

Кибер гэмт хэрэгтэй тэмцэх хэлтэс рүү фэйсбүүк чатаар иргэн гомдол гаргасан гэсэн. Тэр чатыг үзүүлсэн. Гомдол гаргагч нь, манай хийдэг бичлэгээс болж  амиа хорлох гээд байна утгатай зүйл бичсэн байна лээ. Зохиомол нэртэй хаяг байсан. Тэр гомдлын төлөө шөнөөр хойшлуулшгүй журмаар ажиллагаа явууллаа.

Одоо УИХ-ын сонгуулийг баримтжуулсан “18 хоног” киногоо гаргаж эсэхээ ч мэдэхгүй байна. Киноны эвлүүлэг дуусаагүй үргэлжилж байгаа. Тэнд яг киноны хууль бус үйлдлийг баталгаажуулсан дэлгэрэнгүй дүрс байхгүй. Гэхдээ сонгууль хэрхэн шударга бус үйл явдал болдгийг хангалттай харуулсан. Бид сонгуулийн сурталчилгааны хугацаанд аль нэг нэр дэвшигч эсвэл намыг биш, энгийн зургаан хүнийг дагаж ажилласан. Ерөнхийдөө манай кинонд улс төр, хэн нэгэн хүн рүү чиглэсэн агуулга байхгүй. Сонгогчийн боловсрол ямар байгааг л харуулахыг зорьсон. Монголд сонгууль хэрхэн явагддагийг харуулахыг зорьсон. "Ноорог" бол шинэ, залуу баг. Бид юу хийж байгаагаа маш сайн мэдэж байсан. Бид айхгүй, худал мэдээлэл тараасан зүйл байхгүй. 

Мөн MCS-тэй хамтардаг гэсэн мэдээлэл гарсан байна. Бид тэдэнтэй хамтарч ажиллаж байсан. Монголд дүрсийг авч байгаагүй газар гэж байхгүй байх гэж бодож байна. Бид хамтарч ажиллаж байсан. Үүнийг зөвхөн холбож ойлгож болохгүй. 

Манай оффисоос хураасан эд зүйлсийн жагсаалтыг бидэнд өгөөгүй. Гар утас, хувийн эд зүйлсийг хурааж авсан. Зарим хүмүүсээс кодыг нь асууж байгаад, хувийн мэдээллийг нь харсан. Хоорондоо юм ярихыг хориглосон.

Тролл багийн логикийг ойлгохгүй байна. Тролл баг ажиллуулна гэдэг ямар том бүтэц шаардагдахыг сайн мэдэж байгаа байх. Манайх шиг цөөхөн хүнтэй газар ажиллуулах боломжгүй гэв. 

---