"Засгийн газар орлогоо фантаз байдлаар төлөвлөсөн учраас төсөвт тодотгол хийхээс аргагүйд хүрлээ" гэж эдийн засагч Р.Даваадорж хэлж байна. 

Эдийн засагч Р.Даваадорж:

-Нүүрсний үнэ унасантай холбоотойгоор төсөвт тодотгол хийх асуудал яригдаж эхэлж байна. Анх төсөв өргөн барихад хэт тэлсэн төсөв удахгүй тодотгол хийгдэнэ гэдгийг анхааруулж хэлж байсан. Харамсалтай нь манай засгийн газарт тооцоо судалгаа хийдэг байдал бараг л харагдахгүй байна. Хариуцлагагүй байдал даамжирсан байна.

Дэлхийн 200 гаруй орноос төсвөө хоёр дахин данхайлгасан манайх шиг улс байхгүй. Нүүрсний үнээс шалтгаалахгүйгээр манайх төсөвт тодотгол хийх нь ойлгомжтой байсан. Манай улсын валютын нөөц ихээр буурч байна. Монголын төрд хариуцлага байхгүй учраас эд нар хүссэнээрээ зардлаа нэмээд, нэмсэн зардалдаа нийцүүлж орлогоо маш өндөр тавьсан. Цаашид нөхцөл байдал улам буурна гэдэг статистик мэдээлэл байна. Хоёр их наядын цоорхой гараад явж байна. Дураараа дургиж явсны гор нь ингэж гарч ирж байна.

Төр засгийн бодлогын алдааг ард иргэд, аж ахуй нэгжүүд нуруундаа үүрдэг. Олон аж ахуй нэгжүүд хаалгаа барьж байна. Бүх бараа бүтээгдэхүүний үнэ өсөж байна гэв. 

---