Засгийн газрын хуралдаанаас гарсан шийдвэрийг танилцуулж байна. 

ЗГХЭГ-ын дарга Н.Учрал:

-Уул уурхайн бүтээгдэхүүний үнэ дэлхийн зах зээл дээр унаж байна. ЭХЗХ-оос цахилгаан, дулааны үнийг ирэх намраас нэмнэ үүнтэй холбоотойгоор төв банкнаас бодлогын хүүгээ чангаруулсан гэдгээ илэрхийлээд байгаа. Тэгвэл эдийн засгийн нөхцөл байдалтай холбогдуулж цахилгаан, дулааны үнийг нэмэх асуудлыг хойшлуулах арга хэмжээ авах чиглэл өглөө. Уул уурхайн бүтээгдэхүүний орц гарцыг нэмэгдүүлэх тал дээр анхаарч ажиллаж байна. Иргэд маань ямар нэг үнэ, татвар нэмэгдүүлэх асуудалд санаа зовох шаардлагагүй. 

Хөгжлийн банкны гүйцэтгэх захирал З.Нарантуяа:

-Өнөөдрийн хуралдаанаар Хөгжлийн банкны тухай хуулийн нэмэлт өөрчлөлтийн төслийг хэлэлцлээ. Өнгөрсөн хугацаанд банкны балансыг хэвийн болгох чиглэлд багагүй ажиллалаа. Дүрмийн санг нэмэгдүүлэх зэргээр үргэлжлүүлэн ажиллаж байна. Харин одоо зорилтыг илүү тодорхойлж, засаглалыг өөрчлөх шинэ заалтууд холбогдох хуульд тусгагдана. Тухайлбал, экспортын орлогыг нэмэгдүүлэх, ААН-үүдийн гадаад зах зээлд өрсөлдөх чадварыг сайжруулахад чиглэсэн заалтууд орж байгаа.

Сүүлийн гурван жилд зөвхөн зээл эргэн төлүүлэх чиглэлд ажилласан бол одоо цаашид гадаад зах зээлээс хөрөнгө босгож зорилтот бүлэг рүү чиглүүлнэ. Ер нь Хөгжлийн банкны үүрэг роль маш тодорхой байх ёстой. Зорилтот зах зээл рүүгээ оновчтой хөрөнгө оруулалт хийх хэрэгтэй. Бүх салбарт боломжгүй. Тэгэхээр цаашид зөвхөн экспортын орлогоо нэмэгдүүлэх зах зээл дээр төвлөрье гэж байгаа.

Байгаль орчин аялал жуулчлалын сайд С.Одонтуяа:

-ЮНЕСКО-ийн Дэлхийн өвийн хорооны 46 дугаар хуралдаанаас Монгол Улс Эгийн голын УЦС-ыг хэрэгжүүлэхээр төлөвлөн, энэхүү төслийн байгаль орчин, нийгмийн нөлөөллийн үнэлгээг Дэлхийн өвийн нөлөөллийн үнэлгээ хийх заавар, зөвлөмж болон олон улсын стандартын дагуу хийх гэж байгаад сэтгэл хангалуун байгаагаа илэрхийлсэн нь цаашид энэ төсөл амжилттай хэрэгжих үндэс болно гэж үзэж байна.

Монгол Улсын Байгаль орчин, уур амьсгалын өөрчлөлтийн сайд, ОХУ-ын Байгалийн нөөц, экологийн сайд нар “Байгаль нуур болон Сэлэнгэ мөрнийг хамгаалах салбарт хамтран ажиллах тухай” санамж бичигт гарын үсэг зуран санамж бичгийн дагуу хийх ажлын төлөвлөгөөг хэлэлцэн тохирсон. Энэ санамж бичгийн дагуу хоёр талд Эгийн голын УЦС-ын байгаль-экологийн үнэлгээг хийх ажлын хэсгийг байгуулж байсан.

Монголын талаас Эгийн голын УЦС-ын төслийн Сэлэнгэ мөрний сав газрын экосистемд үзүүлэх нөлөөллийг тодорхойлох судалгаа”-ны ажлын даалгаврыг батлан гаргасан. Ажлын хэсэг баталсан ажлын төлөвлөгөөний дагуу 2026 оны 01 дүгээр хагаст багтаан Эгийн голын УЦС-ын нөлөөллийн талаар эцсийн дүгнэлт гаргах зорилттой ажиллаж байна.

Мөн ОХУ, ЮНЕСКО-гийн Дэлхийн өв Байгаль нуурт үзүүлэх нөлөөллийн экологийн иж бүрэн үнэлгээ, төслийн Байгаль орчин, нийгмийн нөлөөллийн үнэлгээ, төслийн Туслах далангийн ТЭЗҮ боловсруулах ажлыг шуурхай зохион байгуулах, зардлыг санхүүжүүлэхээр Засгийн газар шийдвэрлэсэн гэв.

---