Нийслэлийн Засаг дарга бөгөөд Улаанбаатар хотын захирагч Х.Нямбаатар өнөөдөр /2025.03.12/ цаг үеийн асуудлаар сэтгүүлчдэд мэдээлэл өгөв.

Нийслэлийн Засаг дарга Х.Нямбаатар:

-Надтай холбоотой шүүхийн ямар ч тогтоол гараагүй.

"Эко автомашин импортлогчдын холбоо"-ныхон шүүхэд "Хотын дарга бидний нэр төрд халдсан" гэдэг үндэслэлээр нэхэмжлэл гаргасан юм байна лээ. Нийслэлийн Баянгол, Хан-Уул, Сонгинохайрхан дүүргийн Иргэний хэргийн анхан шатны шүүхийн шүүгч нэхэмжлэлийн дагуу иргэний хэрэг үүсгэсэн захирамж гаргасан байна лээ. Захирамжтай холбогдуулан шүүхийн урьдаас гарах шийдвэрийн биелэлтийг баталгаажуулах зорилгоор миний эд хөрөнгөтэй холбоотой битүүмжлэл гаргах захирамж гаргасан. Надад нэг тэрбум төгрөг ч байхгүй. Хэвлэлээр мушгисан мэдээлэл цацагдаж байна. Би шүүгчийн гаргасан шийдвэрт гомдол гаргасан. Маргааш 14.00 цагт тус гомдлыг хэлэлцэнэ. Би хэн нэг хүнээс уучлал гуйх шаардлагагүй.

Улаанбаатар хотын замын нөхцөл байдал ямар байгааг та бүхэн мэдэж байгаа. 80 мянган машин зорчих зам дээр 800 мянган автомашин зорчиж байна. Машин импортолж байгаа хүмүүс хэд, хэдэн эрхзүйн зөрчил гаргаад байгаа. Тухайлбал, татвар төлдөггүй, чанар стандартын шаардлага хангахгүй тээврийн хэрэгсэл оруулж ирдэг, хабрид машинуудыг нүүрсэн яндангүй оруулж ирдэг. Өнгөрсөн арваннэгдүгээр сард дугаар олголт зогссоноос хойш улсын дугаарын бизнес цэцэглэсэн. Дугаарын бизнесийг цэцэглүүлж байгаа иргэдийг шалгуулах асуудлыг АТГ-д өгсөн. 

Намайг ченжүүд жил гаран шантаажилж, доромжилж байна. Би сайн дураараа олны хараал идэх гэж энэ ажлыг хийж байгаа биш шүү дээ. Хандлага сэтгэлгээгээ өөрчилж байж утаа, түгжрэлээсээ сална гэв.

---