УИХ 2008 онд тогтоол гаргаж, стратегийн ордуудын 34-50 хүртэлх хувийг төрийн эзэмшилд байх зохицуулалтыг баталсан байдаг. Гэвч үе үеийн Засгийн газар хувийн хэвшилд байгаа стратегийн ордуудаас төрийн эзэмшлийн хувийг тогтоох, дээрх УИХ-ын тогтоолын хэрэгжилтийг хангах ажлыг хэрэгжүүлэлгүй ирсэн билээ.

Харин УИХ-ын энэ хаврын чуулганаар дээрх асуудлыг хэлэлцүүлэхээр Засгийн газар төлөвлөж, стратегийн орд эзэмшигч аж ахуй нэгжүүдтэй хэлэлцээр хийж буй юм. Энэ асуудлын хүрээнд Үнэн ба зөв намын дарга А.Отгонбаатартай ярилцлаа.

Үнэн ба зөв намын дарга А.Отгонбаатар:

-УИХ-аар 2008 онд уул уурхайн 16 ордыг стратегийн ордод бүртгэж авсан. Энэ ордуудын 34-50 хувийг төрийн эзэмшилд авч, орлогыг Ирээдүйн өв санд ч юм уу цуглуулаад ард түмний сайн сайхны төлөө зарцуулна гээд аль эрт 2008 онд УИХ-ын тогтоол баталсан байдаг. Энэ үед хэрэгжилтийг хангаж ажиллахыг тухайн үеийн С.Баярын Засгийн газарт даалгаж байсан. Гэвч УИХ-ын тогтоолыг Засгийн газар хэрэгжүүлээгүй. Үе үеийн Засгийн газар дээрх тогтоолын төслийг хэрэгжүүлэлгүй явж ирсэн. Харин 2024 оны дөрөвдүгээр сарын 9-ний өдөр Үндэсний баялгийн сангийн тухай хууль батлагдсан. Энэ хуулийн дагуу стратегийн ордуудын 34-50 хувийн орлогыг Баялгийн санд төвлөрүүлье гэдэг асуудал тавигдаж байгаа юм.

Энэ асуудлыг ярьж эхлэнгүүт стратегийн орд эзэмшигчид эгдүүцэж, уурлаж байна. Бид ямар хувийнх нь бизнесийг булааж авах гэж байгаа биш. Монголын ард түмний өвөг дээдсийн буян заяанд бий болсон байгалийн баялгийг Ж.Оджаргал бүтээгээгүй. Нөхөр миний бие А.Отгонбаатар ч бүтээгээгүй. Энэ асуудлыг сөхөнгүүт улс төрийн том сэдэв болж байх шиг байна.

Уул уурхайгаас орж ирсэн орлогоо төвлөрүүлье, байгалийн баялгийн сан бүрдүүлье гэж олон жил ярьсан. Одоо хэрэгжүүлэх гэхээр юу нь болохоо байгаад орилолдоод байгаа юм. Ямар эрх ашгаар хамгаалаад байгаа юм бэ. Хувийн аж ахуй нэгжүүдэд байгаа стратегийн ордуудаас төр тодорхой хувийг эзэмших ёстой.

---