Монгол түмний сар шинийн баярыг тохиолдуулан дээрхийн гэгээнтэн XIV Далай лам мэндчилгээ дэвшүүлжээ.

Мэндчилгээнд "Монгол, Түвд хоёр улс олон зууны турш оюун санааны хувьд гүн нарийн барилдлагатай ард түмэн билээ. Монголын ард түмэн ялангуяа хүүхэд, залуус бурхны шашныг улам бүр шимтэн сонирхож байгаа нь сайшаалтай. Бурхан багшийн сургаал нь хүчирхийллээс ангид энэрэнгүй сэтгэлийг номлодог учраас хүн төрөлхтний сайн сайхны төлөө асар их хувь нэмэр оруулах боломжтой. Бид эдгээр эрхэм чанаруудыг нарийн судалж, утгыг нь зөв таньж ухаарах хэрэгтэй.

Цаашлаад өөрсдийн амьдралдаа дадуулж, утга учиртай амьдралаар амьдрах нь чухал билээ. Бурханы шашныг сэтгэл судлалын үүднээс танин мэдсэнээр бид оюун санаа, сэтгэлийн мөн чанарыг ухааран ойлгох бөгөөд энэ нь өнөө үед эрдэмтэн судлаачдын сонирхон судалж байгаа чухал сэдэв болж байна. Үүний зэрэгцээ бид муу сэтгэлээ дарж, сайхан сэтгэлийг өөртөө төлөвшүүлэхийн тулд бурхны шашны сургаал номлолыг судалж, эргэцүүлэн бодож, бясалгах ёстой юм.

Монголын ард түмэнд бурхны шашны талаарх мэдлэг, ойлголтыг түгээх үйлсэд хүчин зүтгэж буй Гандантэгчэнлин хийд болон "Гандан" телевизийн хамт олонд чин сэтгэлийн талархал илэрхийлье. Монгол ахан дүүстээ сар шинийн баярын мэндийг өргөн дэвшүүлье. Та бүхэн буян их хурааж, эв найртай, амар амгалан, байх болтугай. 2025 оны хоёрдугаар сарын 27" хэмээжээ.

---