"Байнгын хорооны ажлын баг европын хиймэл оюун ухааны эрх зүйн орчин ямар байгаа талаар судалж байна" гэж УИХ-ын гишүүн, УИХ-ын Инновац, цахим бодлогын байнгын хорооны дарга Ж.Золжаргал хэлж байна. 

УИХ-ын гишүүн, УИХ-ын Инновац, цахим бодлогын байнгын хорооны дарга Ж.Золжаргал:

-Хиймэл оюуныг төрийн үйлчилгээнд ашиглаж нэвтрүүлнэ гээд олон төрийн байгууллага төлөвлөчихсөн байгаа. Хувийн хэвшил дээр хэрэгжээд явж байна. Энэ ажлыг ямар байдлаар хэрэгжүүлэх вэ гэдэг стратеги төлөвлөгөөгөө ЦХИХХЯ боловсруулж байгаа. НҮБ-ын хөгжлийн хөтөлбөрийн дэмжлэгтэйгээр Монгол улс хиймэл оюуны ашиглалт хөгжүүлэлтэд бэлэн байгаа эсэх үнэлгээ боловсруулж байна. Инновац, цахим бодлогын байнгын хороо, яамтайгаа хамтран ажиллаж байна. Инновац, цахим бодлогын байнгын хорооны ажлын баг Европын хиймэл оюуны эрхзүйн орчин ямар байгаа асуудалд ажиллаад эхэлсэн.

Манай улс аль хэдийн хиймэл оюун ухааны ашиглаад эхэлсэн. Боловсролын байгууллага, эмнэлэг, уул уурхай, төрийн байгууллагуудад нэвтрээд эхэлсэн. Харин одоо цаашаа хэрхэн хурдан алхах вэ гэдэг нь чухал. Тухайлбал, хиймэл оюун ухаан ажиллахын тулд мэдээлэлтэй байх хэрэгтэй. Нийтийн мэдээллээ ил тод болгох хуулийн заалтаа хэрэгжүүлэх шаардлагатай байна.

Асуудал хаана байна гэдгээ бид мэдэж байгаа. Хиймэл оюун ухаан ашиглаад асуудлаа шийднэ гэдэг өрөөсгөл. Бидний өөрсдийн зохион байгуулалт, шийдвэр гаргах зүрх зориг нэмээд хиймэл оюун ухааныг ашиглана. Нийслэлийн тухайд барилга, хот төлөвлөлт, түгжрэл дээр хиймэл оюун ухааныг ашиглаад явах хэрэгтэй гэв. 

---