Монгол Улсын Их хурлын намрын ээлжит чуулган завсарлаж, гишүүдийн олонх тойрогтоо ажиллаж байна.
Тухайлбал, УИХ-ын 2024 оны сонгуулийн I тойрог буюу Архангай, Өвөрхангай, Баянхонгор аймгаас сонгогдсон Г.Хосбаяр, О.Алтангэрэл, С.Ганбаатар тэргүүтэй гишүүд Архангай, Өвөрхангай аймагт ажиллажээ. 

Дээрх гишүүд УИХ-ын намрын чуулганаар хэлэлцэн баталсан хуулийн төсөл, УИХ-ын тогтоолын төслийн талаар мэдээлэл өгч, иргэдийн санал, бодлыг сонсжээ. Иргэдийн зүгээс уул уурхайн салбараас орж ирж буй хөрөнгө оруулалтыг үйлдвэр, бүтээн байгуулалтад үр дүнтэй зарцуулах, төрийн алба хүнд сурталгүй, түргэн шуурхай, цомхон байх асуудлыг хөнджээ.

---