УИХ-ын Ёс зүй, дэгийн байнгын хорооны өчигдөр өдрийн хуралдаанаар Монгол Улсын Ёс зүйн хорооны 2024 оны тайланг хэлэлцэж, Байнгын хорооны тогтоолын төслийг хэлэлцлээ. УИХ-ын гишүүн, Ёс зүй, дэгийн байнгын хорооны дарга Б.Баярбаатар төрийн албаны ёс зүй нь УИХ-ын гишүүдээс эхлэхийг анхааруулж, хуралдаа суухгүй байгаа гишүүдэд шүүмжлэлтэй хандсан юм.

Ёс зүй, дэгийн байнгын хорооны дарга Б.Баярбаатар:

-Төрийн албаны ёс зүйг сайжруулахын тулд УИХ-ын гишүүд хичээж ажиллах шаардлага байгаа нь Ёс зүйн хорооны 2024 оны тайлан болон байнгын хорооноос байгуулагдаж ажилласан ажлын хэсгийн дүгнэлтээс харагдаж байна.

Анхны 126 гишүүнтэй парламентын намрын ээлжит чуулган энэ долоо хоногт завсарлах болов уу гэж харж байна. Чуулган завсарлаж буйтай холбоотойгоор гишүүдийн ирцтэй холбоотой асуудлыг нарийвчилж гаргах зайлшгүй шаардлага байна. Хуралдаа суудаггүй гишүүд байна. Халтмаагийн Баттулга, Сүрэнжавын Лүндэг. Иргэд, олон нийтийн зүгээс хуралдаа суухгүй байгаа гишүүдэд онцгой анхаарал хандуулж байна. Хууль тогтоох байгууллагад иргэдийн төлөөллийг хангах гэж сонгогдсон бол хуралдаа суух ёстой. Хийх ажил нь. Тэр хүний үүрэг. Тэгэхээр Б.Ариунзаяа гишүүн гишүүдийн ирцийн нарийвчилсан мэдээллийг оруулж ир. Шаардлагатай бол Ёс зүй, дэгийн байнгын хорооны дараагийн хуралд хуралдаа суудаггүй гишүүдэд хариуцлага тооцох асуудлыг оруулж ирээрэй гэж та бүхэндээ хэлье гэв.

---