Монгол Улсын Засгийн газар, Францын “Орано майнинг” компанитай уран олборлох Хөрөнгө оруулалтын гэрээнд гарын үсэг зурлаа.

Монгол Улсын Засгийн газраас Монгол, Францын хамтарсан “Бадрах Энержи” ХХК-ийн хөрөнгө оруулагч, Бүгд Найрамдах Франц улсад бүртгэлтэй “Орано Майнинг” компанитай байгуулах Хөрөнгө оруулалтын гэрээг Монгол Улсын сайд, ЗГХЭГ-ын дарга Н.Учрал, Сангийн сайд Б.Жавхлан, Аж үйлдвэр, эрдэс баялгийн сайд Ц.Туваан,“Эрдэнэс Монгол” ХХК-ийн гүйцэтгэх захирал С.Наранцогт нар үзэглэлээ. 

Энэхүү гэрээ нь Монгол Улсын Засгийн газраас гуравдагч оронтой байгуулах хоёр дахь томоохон хөрөнгө оруулалтын гэрээ болж байна. Гадаадын хөрөнгө оруулалтыг нэмэгдүүлж, улс, орон нутгийн төсөвт хөрөнгө төвлөрүүлэх, ажлын байр бий болгох, шинэ технологи нутагшуулах, олон улсын хамтын ажиллагаа зэрэг нийгэм, эдийн засагт үзүүлэх шууд нөлөөллөөс гадна цаашид уул уурхай, ашигт малтмалын салбарт хийгдэх хөрөнгө оруулалтын гэрээнд жишиг тогтооно гэж үзэж байна.

Монгол Улсын Засгийн газар, Бүгд Найрамдах Франц Улсын "Орано Майнинг" С.А.С хоорондын “Хөрөнгө оруулалтын гэрээ”-нд гарын үсэг зурах ёслолын ажиллагаанд дараах төлөөлөгчид оролцлоо. 

Монголын талаас:

• Монгол Улсын Ерөнхий сайд Л.Оюун-Эрдэнэ 
• Монгол Улсын Засгийн газрын гишүүн, Шадар сайд Т.Доржханд
• Монгол Улсын Засгийн газрын гишүүн, Шадар сайд С.Амарсайхан
• Монгол Улсын сайд, Засгийн газрын Хэрэг эрхлэх газрын дарга Н.Учрал
• Сангийн сайд Б.Жавхлан
• Аж үйлдвэр, эрдэс баялгийн сайд Ц.Туваан
• Нийслэлийн Засаг дарга бөгөөд Улаанбаатар хотын Захирагч Х.Нямбаатар 
• Гадаад харилцааны яамны Төрийн нарийн бичгийн дарга Л.Мөнхтүшиг
• “Эрдэнэс Монгол” ХХК-ийн гүйцэтгэх захирал С.Наранцогт

Францын талаас:

• Бүгд Найрамдах Франц Улсын Европ, гадаад хэргийн сайдын дэргэдэх Гадаад худалдаа, хилийн чанад дахь франц иргэдийн асуудал эрхэлсэн сайд Лурон Сэн Мартайн
• БНФУ-аас Монгол Улсад суугаа Онц бөгөөд Бүрэн эрхт Элчин сайд хатагтай Коринн Пэрейра
• Гадаад худалдаа, хилийн чанад дахь иргэдийн асуудал эрхэлсэн сайдын Ажлын албаны дэд захирал Никола Жаннин
• Сайдын хэвлэл, олон нийттэй харилцах зөвлөх Давид Даүла
• Европ, гадаад хэргийн яамны Ази, Номхон далайн газрын дэд захирал хатагтай Мириам Сэн-Пиер
• Эдийн засаг, Санхүү, Аж үйлдвэр, Цахим тусгаар байдлын яамны Төрийн сангийн газрын дэд захирал хатагтай Стэфани Лабарт
• Элчин сайдын яамны Тэргүүн зөвлөх Жулиен Пупер
• Эрчим хүчний атташе Солензаяа Дэмарс
• Эдийн засгийн атташе Инес Хааб
  
  

---