УИХ-ын чуулганаар Малын индексжүүлсэн даатгалын тухай хуулийн төсөл болон хамт өргөн мэдүүлсэн хуулийн төслүүдэд нэмэлт өөрчлөлт оруулахыг хэлэлцэж байна.

Монгол Улсын малчин өрхийн 10-18 хувь нь Малын индексжүүлсэн даатгалд хамрагдаж, нийт малын 7-10 хувийг даатгаж байгаа нь энэхүү хуульд нэмэлт өөрчлөлт хийх шаардлагатайг харуулж байна.  Байгалийн гамшгаас урьдчилан сэргийлэх, малчдын мал сүргийг учирч болзошгүй эрсдэлээс хамгаалах даатгалын тогтолцоог бэхжүүлэх зорилгоор Монгол Улсын Засгийн газраас Малын индексжүүлсэн даатгалын тухай хуульд дараах өөрчлөлтүүдийг оруулахаар боловсруулжээ. 

УИХ-ын дарга Д.Амарбаясгалан:

-Малын индексжүүлсэн даатгалд иргэд сэтгэл дундуур байгаа учраас хууль эрх зүйн орчинг нь сайжруулалт хийж өгөх ёстой гэдэг зорилго агуулж байгаа нь зөв. Гэхдээ хийж байгаа өөрчлөлт нь дахиад амьдралаас хол тасархай байж болохгүй. Үүн дээр маш сайн анхаарах шаардлагатай. Өнгөрсөн жил зуднаар орон нутагт ажиллахад малчид индексжүүлсэн даатгалын нөхөн төлбөр олгогддог байдал сумд 6 хувьдаа хүрээгүй тохиолдолд хий хоосон даатгал хийлгээд байна гэдэг зүйлсийг ярьж байсан. Харин 6 хувьдаа хүрсэн тохиолдолд малаа хорогдуулсан даатгал авахаас гадна малаа хорогдуулаагүй иргэд ч тодорхой хэмжээний нөхөн төлбөр авдаг юм билээ.

Сангийн сайд Б.Жавхлан:

-Энэ хууль дээр гол хоёр өөрчлөлт байгаа. Тодруулбал, Даатгалын хувь хэмжээнд огт өөрчлөлт орохгүй. Төлбөрт огт өөрчлөлт орохгүй. Харин даатгалын тохиолдол үүсэх эрсдэлийн босгыг нь 6 хувь гэж хатуу заасны үгүй болгож, уян хатан болгож оруулж ирж байгаа. Хоёрдугаарт, зуд болсны дараа хагас жилээр статистик гарахаар даатгалын төлбөрөө одоо өгдөг. Үүнийг болиулаад уян хатан болгож байгаа. Арван нэгдүгээр сараас сар сарын мэдээ аваад эрсдэлийн босго түвшинг давсан тохиолдолд явцын дунд нөхөн төлбөрийг нь өгдөг болох гол өөрчлөлт орж ирж байгаа. Малчид руугаа чиглэсэн зөөлөн болж байгаа гэв. 

---