Нийтийн албан тушаалтны хууль бус хөрөнгийг хураан авах, нөхөн төлүүлэх тухай хуулийн төслийн олон нийтийн хэлэлцүүлэг өнөөдөр болов. Энэ үеэр ХЗДХ-ийн сайд О.Алтангэрэл "Төрийн өндөр албан тушаал хашсан буюу эрсдэлтэй хүмүүсийн жагсаалт гаргаж, заавал шалгана. Авлигын үр шимээр бий болсон хөрөнгөө хүүхдийнхээ нэр дээр шилжүүлсэн байвал хураахаас өөр аргагүй" гэж мэдэгдэв. 

ХЗДХ-ийн сайд О.Алтангэрэл:

-Бид Дагаж мөрдөх журмын тухай хуульдаа оруулна гэж төлөвлөж байгаа. Нийтийн албан тушаалтан буюу УИХ, Засгийн газрын гишүүн, Ерөнхийлөгч, Үндсэн хуулийн Цэцийн гишүүн, Дээд шүүхийн шүүгч гээд төрийн өндөр албан тушаалтнуудаас эхлээд төрийн өмчит компанийн захирлууд ажил эрхэлж байх хугацаанд олсон орлогоо хууль ёсоор тайлбарлаж чадахгүй бол хураалгадаг байя гэдэг энэ зарчмын дагуу төслийг боловсруулсан.

Эрүүгийн хуулийн үндэслэлгүй хөрөнгөжих буюу хууль ёсоор хөрөнгөжиж байгаа энэ зүйл заалт дахиад цаашилбал авлига албан тушаалын хэрэгтэй холбогдож байгаа энэ үйл явдлыг углуургаар нь таслан зогсооё. Дахиж авлигын гэмт хэрэг гарахад юуны түрүүнд хөрөнгийг хураадаг энэ нөхцөл рүү аваачъя. Хураасан хөрөнгөө боловсрол, эрүүл мэднийн салбарт зарцуулъя, Тусгай сан байгуулъя гэдэг хуулийн төслийг хэлэлцэж байна.

Хамгийн түрүүнд өнгөрсөн жилүүдэд төрийн өндөр албан тушаал хашсан буюу эрсдэлтэй хэсгийнхний жагсаалт гаргана. Энэ хүмүүсийг заавал шалгана гэсэн жагсаалт гаргана гэсэн үг. Хэн нэгний нэр дээр шилжүүлсэн хөрөнгө байгаа. Тайлбарлаж чадахгүй, авлигаар олсон хөрөнгөө хүүгийнхээ нэр дээр аваад өгчихсөн байвал хураахаас өөр аргагүй. Ямар ч буруугүй хүнээс юмыг нь хураах гэж байна гэх гуйвуулаг яваад байна. Тэгэхгүй. Үүнд 2002 оноос хойшхи харилцааны асуудал яригдана гэв.

---