Хууль зүй дотоод хэргийн сайд О.Алтангэрэл жолоочийн хариуцлагын даатгалын тарифыг нэмэх шийдвэрийг хүчингүй болгосон талаараа мэдээлэл хийв.

Хууль зүй дотоод хэргийн сайд О.Алтангэрэл: 

-Иргэд, байгууллагаас жолоочийн даатгалын хураамжийн нэмэгдэлтэй холбоотой гомдол ирсэн. Санхүүгийн зохицуулах хорооноос ирүүлсэн жолоочийн даатгалын хураамжийн итгэлцүүр шаардлага хангаагүй гэж үзсэн. СЗХ-оос бүрдүүлэх ёстой материалын нөлөөллийн мэдээллийг бодит байдалтай нийцэхгүйгээр ирүүлсэн байна. Энэ итгэлцүүрээр юу болж байна вэ гэхээр жолоочийн хариуцлагын даатгалын хувь хэмжээ эрс нэмэгдэж 700 мянга болсон. Монгол Улсын Үндсэн хууль зөрчсөн гэж бид мөн үзэж байна. Иргэдийг насаар нь ялгаварласан байна гэж үзсэн учраас ХЗДХ-ийн сайдын хувьд шийдвэр гаргаж, Улсын нэгдсэн сангийн бүртгэлээс хасаж байна. 

Өөрөөр хэлбэл Санхүүгийн зохицуулах хорооны жолоочийн даатгалын хураамжийн итгэлцүүрийг баталсан шийдвэр хэрэгжих боломжгүй боллоо. Учир нь захиргааны хэм хэмжээний акт Хууль зүй, дотоод хэргийн яамны нэгдсэн бүртгэлд бүртгэгдэж байж хэрэгждэг. Тиймээс Санхүүгийн зохицуулах хороо үүнтэй холбоотой материалуудаа дахин хянаж, хуульд нийцүүл гэдэг байдлаар буцаасан. Одоо олон нийтийн бухимдаад байгаа энэ даатгалын харилцаа хууль зүйн хувьд боломжгүй болсон.

Нэгэнт шийдвэр гарсан тул иргэд даатгалын компаниудаас мөнгөө буцааж нэхэмжлэх боломжтой. Даатгалын компаниуд мөнгийг нь буцаан өгөх үүрэгтэй" гэв.

---