Монгол Улсын Шадар Сайд С.Амарсайханы тушаалын дагуу ажлын хэсэг байгуулагдаж, зах худалдааны төвүүдээр хяналт шалгалт зохион байгуулж байна. Ажлын хэсэг Нийслэл Улаанбаатар хотын иргэдийн хүнсний хэрэгцээнд нийлүүлж байгаа мах, махан бүтээгдэхүүний чанар, аюулгүй байдалд хяналт шалгалт зохион байгуулна.

Ажлын хэсэг өнөөдөр “Амгалан” худалдааны захад ажиллалаа. Нийслэлийн “Амгалан” худалдааны төв өдөрт 15-20 тонн мах борлуулдаг. Энэ төвд ихэвчлэн зүүн аймгуудаас ирсэн малын гаралтай, мах, махан бүтээгдэхүүн борлуулагдаж байна.

Хяналт шалгалтаар:

“Амгалан” худалдааны төвийн хүнсний дээж авах лаборатори нь Итгэмжлэлийн үнэмлэхгүй, зөвхөн мал эмнэлгийн газрын зөвшөөрөлтэйгөөр ажиллаж байсан нь тогтоогджээ. Монгол улсад үйл ажиллагаа явуулж байгаа хүнсний лаборатори болгон Үндэсний Итгэмжлэлийн төвийн баталгаат гэрчилгээтэй байх шаардлагатай юм. Гэтэл өнөөдрийн шалгалтаар “Амгалан” худалдааны төвийн хүнсний дээж авах лаборатори итгэмжлэлийн гэрчилгээгүйгээр үйл ажиллагаагаа явуулж байгаа зөрчил илэрлээ. Амгалан худалдааны төв өдөрт дунджаар 15 тонн мах худалдаалж байна. Энэ худалдааж байгаа мах нь 100 хувь эрүүл гэдгийг тодорхойлж чадахгүй, хүчин чадал муутай, стандартын шаардлага хангаагүй лабораторитой байна гэж ойлгож болно.

Зарим худалдаачны жин хэмжүүр зөрүүтэй зааж байна.

Стандарт, хэмжил зүйн газар худалдаачдын жинд хяналт шалгалт тавьж ажиллалаа. Гэтэл зарим худалдаачдын жин зөрүүтэй зааж байгаа нь тогтоогдоод байна. Өөрөөр хэлбэл худалдаачны жин дутуу хэмжиж, хэрэглэгчдээс илүү мөнгө авах тохиолдол гардаг юм. Худалдаачдын жин зөв зааж байгаа эсэхт стандарт, хэмжил зүйн газрын улсын алхах байцаагч нар хяналт тавьж, жилд 2 удаа лац тэмдэг байрлуулдаг. Гэтэл зарим худалдаачдын жингийн лац тайлагдсан гэх мэт зөрчил илэрч байна.

Өнөөдрийн хяналт шалгалтын ажлын хэсэгт

• Стандарт, хэмжил зүйн газар
• Мал эмнэлгийн ерөнхий газар
• Үндэсний итгэмжлэлийн төв
• Нийслэлийн мал эмнэлгийн газар
• Улсын мал эмнэлэг, ариун цэврийн төв лабораторийн байгууллагын төлөөллүүд оролцож байна.

Өвлийн идэшний улирал эхэлсэн энэ үед иргэдийн гар дээр очих мах эрүүл, аюулгүй байх ёстой юм. Тиймээс мах махан бүтээгдэхүүнд тавих хяналтыг сайжруулж ажиллаж байна. Энэ сарын 25 хүртэл зах худалдааны төвүүдээр зарагдаж байгаа мах, махан бүтээгдэхүүний эрүүл, аюулгүй байдалд хяналт тавьж ажиллахаар төлөвлөөд байна.

---