УИХ дахь Аж үйлдвэржилтийн байнгын хороо өчигдөр Монгол Улсын 2025 оны төсвийн төсөлтэй холбогдуулан ХХААХҮЯ-ны төсвийн төслийг хэлэлцсэн юм. Энэ үеэр УИХ-ын гишүүн Г.Лувсанжамц “Шинэ хоршоо” хөдөлгөөний зээл олголтын асуудлаар хөндөж, шүүмжлэлийн байр суурьнаас хандсан билээ.

Тэрээр “Хоршоодод шаардлагатай санхүүгийн эх үүсвэрийг шийдвэрлэнэ гээд хуульд заасан. Зээл аваад байвал хоршоод хөгжөөд, мал аж ахуйн салбар цоройгоод л явах юм шиг харагдаад байгаа. Гэтэл санхүүжилт авсан хоршоодын орлогын өсөлтийн хувь, шинэ ажлын байр хэдээр бий болсон, бизнесийн тогтвортой байдал нь ямар байгаа эсэх нь огт тодорхойгүй байна” хэмээсэн юм.

Тэгвэл түүний дээрх шүүмжлэлд УИХ-ын гишүүн, Хөдөө аж ахуйн үйлдвэрлэлийг дэмжих бодлогыг хэрэгжүүлэх ажлын хэсгийн ахлагч М.Мандхай дараах тайлбарыг хийлээ.

УИХ-ын гишүүн М.Мандхай:

-УИХ-ын гишүүн Ганзоригийн Лувсанжамц ийм мэдэгдэл хийжээ. Уг нь сошиалаар элдэв мэдэгдэл шидэж суухын оронд УИХ-ын дэргэд байгуулагдсан хөдөө аж ахуйн үйлдвэржилтийг дэмжих ажлын хэсгийнхэнтэй ирж уулзаад, мэдээлэл аваад, хамтарч ажиллах боломж нээлттэй бий. Бодвол түгжрэл бууруулахаар гадаадад томилолттой явж ирээд агаараасаа буугаагүй бололтой.

Нэгэнт эрхэм гишүүн Г.Лувсанжамц сошиалаар асуугаад байгаа учраас би бас хариуг нь сошиалаар өгөх хэрэгтэй гэж ойлгов.

1. “Шинэ хоршоо” хөдөлгөөн бол зээл тараадаг хөдөлгөөн биш. Малчид байгалийн гамшигт үзэгдлийг эрсдэлгүй даван туулах, малын түүхий эдийг нэмүү өртөг шингээн борлуулах, даац хэтэрсэн бэлчээрийг зөв зохистой ашиглах, хүн хүч дутмаг байгаа хөдөө орон нутагт хөдөлмөрөө хорших замаар хамтарч ажиллах боломжийг нэмэгдүүлэхэд чиглэсэн хөтөлбөр.

2. Шинэ хоршоо хөдөлгөөний хүрээнд арилжааны банкууд зээл олгож байгаа. Банкууд өөрсдөө эрсдлээ тооцож, судалгаа хийж, малчидтай гэрээ байгуулан зээл олгодог. Өнөөдрийн байдлаар 4585 малчин хоршоололд нэгдээд байна.

3. ХААИС, ХАА-н судлаачид, доктор, профессор, багш, эрдэмтэд ХАА-н салбарын тогтолцооны зураглалыг гаргахаар судалгаа явуулж, дүн шинжилгээ хийгээд дуусч байна. “Шинэ хоршоо”, “Хүнсний хувьсгал”, “Цагаан алт” гэсэн гурван том хөтөлбөрийн эрчимжүүлэх, үр өгөөжтэй болгохоор энэхүү судалгааг хийж байгаа юм.

4. “Шинэ хоршоо”-г эрчимжүүлэх Үндэсний хороо байгуулагдсан бөгөөд эрдэмтэн, багш судлаачидтай хамтран хоршоог чадавхжуулах сургалтын хөтөлбөр, гарын авлагыг боловсруулсан.

Өнөөдрийн байдлаар хоршоологчдыг чадавхжуулах сургалтыг найман аймагт зохион байгуулж, нийт 2000 орчим хоршоологчид энэ сургалтад хамрагдаад байна. Зээлийн хөрөнгө оруулалт, зориулалт, үр дүнгийн талаарх бүх мэдээлэл нээлттэй бий.

Иймд Та хоршоонд санаа зоволгүй хотынхоо түгжрэлд анхаарна уу гэжээ.

---