Худалдааны нээлттэй орнуудад мах, хүнсний бүтээгдэхүүнээ ч гаргаж чадахгүй байгаа манай улс Евразийн гэрээнд нэгдэх нь ашиггүй гэж УИХ-ын гишүүн О.Номинчимэг хэлж байна. 

УИХ-ын гишүүн О.Номинчимэг:

-Евразийн хэлэлцээрийн асуудалд маш болгоомжтой хандах хэрэгтэй. Олон улсын худалдааны гэрээнд нэгдэхдээ зөвшилцөхөөр УИХ-д оруулж ирдэг. Ингээд соёрхон баталдаг. Харин энэ гэрээг түр гэрээ гэж нэрлээд байгаа нь ойлгомжгүй байдлыг үүсгэж байна. УИХ-ын гадаад хэлэлцээр соёрхон батлах эрхийг гурван жилийн хугацаанд түр гэрээ нэрийн дор Засгийн газар өөрийн дураар ийм гэрээ хийх гэж байна уу гэдэг хардлага төрж байна. Хүнсний хувьсгал, дотооддоо хүнсний хангамжаа хэрхэн сайжруулах вэ гэдэг чухал цаг үед энэ гэрээг хэрэгжүүлэхдээ тун болгоомжтой байх хэрэгтэй.

Түр гэрээний төсөл гээд 150 гаруй хуудас материал явж байна. Квотын асуудлыг тогтоогоогүй байгаа ч манайх шиг жижиг импортлогч улсад гадаадын шахалтууд ихээр орж ирдэг. Яваандаа энэ нь манай дотоодын аж ахуй нэгжүүдийг хамгаалахад эрсдэл учирна. Худалдааны нээлттэй орнуудад мах, хүнсний бүтээгдэхүүнээ ч гаргаж чадахгүй байгаа манай улс Евразийн гэрээнд нэгдэх нь ашиггүй гэв. 

---