2025 оны төсвөөс 2.3 их наяд төгрөгийн зардал хасаж, дахин УИХ-д өргөн барьсантай холбогдуулан Сангийн сайд Б.Жавхлан мэдээлэл хийж байна.

УИХ-ын гишүүн, Сангийн сайд Б.Жавхлан: 

-Төсвийг 2.3 их наядаар хасах шаардлага үүсэж байгаа учир хувийн хэвшлээ дэмжинэ. Татварыг бууруулна, зээлжих зэрэглэл бол аж ахуйн нэгжүүдэд өгч байгаа маш том дэмжлэг болно. Мөн, газар, дэд бүтцээр дэмжинэ. 

Төсөв танагдаж байгаа учир арабын орнуудад хэрэгжээд явж байгаа баялгийн солилцооны зарчмаар бүтээн байгуулалт хийе, эрх зүйн орчныг нь бий болгож өгье. Гадаадын хөрөнгө оруулалтыг дуудъя. Зарим бүтээн байгуулалтыг хувийн хэвшлээр гүйцэтгүүлье гэж байна. 

Яамдууд дээр байсан гадаад томилолтын зардлыг 50 хувиар хассан. 

Хуулийн заалттай төсвүүд хасагдаагүй. Эрчим хүчний салбарын шинэ төслүүдийг хөндөөгүй. Хавдрын эмнэлгийн их засварын төсвийг бууруулаагүй. Төрийн албан хаагчдын цалин 6 хувь нэмэгдэж байгаа. Үүнд 438 тэрбум төгрөг төсөвлөсөн. Ер нь цалин нийт долоон их наяд болж байгаа. 

Эрүүл мэнд болон боловсролын салбарын төсвийг хасаагүй. 215 мянган төрийн албан хаагч байдаг. Үүний гуравны нэг буюу 80.000 нь боловсролын салбарт байдаг учир Боловсролын сайдын багц хамгийн өндөр хэвээр байгаа. 

Зам, тээврийн салбарын 38 замын төсөв хэвээр үлдсэн. Хасагдсанаас Алтанбулаг-Дарханы дөрвөн эгнээ замын төсөв хасагдсан. Гэхдээ үүнийг төсвөөс хийхийг нь хойшлуулаад, төр, хувийн хэвшлийн түншлэлээр хэрэгжүүлэх боломж байгаа гэж харж байгаа. Говийн замуудын төсөв хасагдаагүй. 

Ирэх оны төсвөөс 2.3 их наяд төгрөгийн зардал хасагдсантай холбогдуулан Арабын орнуудад хэрэгжээд явж байгаа баялгийн солилцоог хэрэгжүүлэх, хууль эрх зүйн орчныг нь бий болгох шаардлага үүсэж байгаа. Гадаадын хөрөнгө оруулалтыг дуудъя. Зарим ажлуудыг хувийн хэвшлээр гүйцэтгүүлье. 

Энэ бүхний эцэст инфляцийн дарамт тодорхой хэмжээгээр буурна гэв. 

---