УИХ-ын намрын ээлжит чуулганы өнөөдрийн хуралдаанаар Монгол Улсын Ерөнхийлөгчийн бүхэлд нь тавьсан хоригийг хүлээн авч хууль, тогтоол хүчингүй болсонтой холбогдуулан Монгол Улсын 2025 оны төсвийн тухай хуулийн төслийг хэлэлцэх дэгийн тухай хуулийн төслийг хэлэлцэж байна. Өнөөдрийн хуралдаанд 82 гишүүн ирцээ бүртгүүлжээ.

УИХ-ын дарга Д.Амарбаясгалан:

-Танхимын урд эгнээнд сууж байгаа олон сонгогдсон гишүүд мөн л өнөөдрийн хуралдаанд ирээгүй байна. Тиймээс УИХ-ын гишүүд ирсэн ирцээрээ суудлаа эзэлдэг байх зохицуулалтын журмыг боловсруулж байна. УИХ-ын гишүүдийн хариуцлага, ёс зүйн талаар ард иргэд шаардлага тавьж байна. Нийтээр нь харлуулдаг биш, идэвхтэй оролцдог ажил хэрэгч хүмүүс нь УИХ-ын үйл ажиллагаанд оролцох оролцоог нь дэмжиж урамшуулах ажлыг зохион байгуулна.

Олон нийтэд хов хоосон парламентын танхим харагдаж болохгүй. Яг одоогийн байдлаар 82 гишүүн ирцээ бүртгүүлсэн байна. Үүнээс танхимд 60 гаруй гишүүн суугаад үлддэг. Өглөө орж ирж ирцээ бүртгүүлчихээд гараад явчихдаг. Нэг сайхан эрт ирдэг ирцтэй, өдөржингөө хуралд суухгүй. Тэгсэн хэр нь бүх санал нь эсрэг гардаг гишүүд зөндөө байна. Оролцоогоо хангаж байгаа гишүүдийг урагш суух нөхцөлөөр хангана.

Өнөөдрийн дэгийн хуулийг нэг удаа хэлэлцээд батлах гэж байна. Энэ хууль нь төсвийн хэлэлцүүлэг хоорондын хугацааг хэмнэх зорилготой юм. Өдөр бүр парламент хуралдаад хэлэлцүүлгээ хийх боломжтой. Хэрвээ энэ хууль дэмжигдсэн тохиолдолд Засгийн газар өнөөдөр хуралдаад, төсвийн төслөө өргөн барьсан тохиолдолд энэ долоо хоногтоо нэгдүгээр хэлэлцүүлгээ хийгээд, амралтын өдрүүдэд ажлын хэсгийг хуралдуулна. Ингээд ирэх долоо хоногийн ажлын таван өдөрт байнгын хороо, чуулганы хуралдааныг тасралтгүй хуралдуулаад энэ асуудлаа шийдвэрлэе гэж байгаа. УИХ, Засгийн газрын түвшинд байгаа төсвийн хэлэлцүүлгийн асуудал орон нутгийн түвшинд очиж хүндрэл үүсгэж болохгүй. Ийм учраас нэн яаралтай горимоор энэ асуудлыг шийдвэрлэхээр оруулж ирсэн гэв.

---