МҮХАҮТ-ын ерөнхийлөгчид нэрээ дэвшүүлээд буй Т.Дүүрэнг яллагдагчаар тооцон 30 хоногийн хугацаагаар цагдан хорих захирамж шүүхээс гаргажээ.

Тэрбээр твиттер сүлжээн дэх өөрийн хаягтаа “Намайг үндэслэлгүй хэргээр гэнэт дуудаж 30 хоног таслан хорихоор боллоо. Миний бие өөрийн биеэр бус ч Танхимын нөхөн сонгуульд оролцох эрмэлзэлтэй байгааг үүгээр мэдэгдэж байна. Өнөө орой MNB сувгаар гарах ярилцлагыг нэвтрүүлэхийг хоригложээ. Үг хэлэх, өөрийгөө өмгөөлөх бүх эрхийг хязгаарлалаа. Энэ улсад хувийн хэвшлийн орон зай байхгүй болжээ. Өнөөдөр намайг, маргааш та нарыг дуудаж хорин таслах аж” хэмээн бичсэн юм.
Түүнд Чингэлтэй дүүргийн Эрүүгийн хэргийн анхан шатны шүүхийн шүүгчийн захирамжийн дагуу дээрх цагдан хорих таслан сэргийлэх арга хэмжээг авсан байна.
Бидний авсан мэдээллээр Т.Дүүрэнг 2020 оноос хойш АТГ-ын Мөрдөн шалгах хэлтэст шалгаж буй бөгөөд түүнийг улс төрч, сайдаар ажиллаж байсан нэгэнтэй хамтарч төслийн 2.1 тэрбум төгрөг шамшигдуулсан байж болзошгүй хэмээн яллагдагчаар тооцсон гэнэ.

---