Эрдэнэт үйлдвэрийн худалдан авах үйл ажиллагаанд хиймэл оюун ухаанд суурилсан TenderEval 1.0 системийг нэвтрүүлж эхэлжээ. Уг ажлын хүрээнд “Чимэгэ Системс”-тэй хамтран ажиллаж байгаа бөгөөд 2026 оноос “Эрдэнэс Монгол” нэгдлийн хэмжээнд худалдан авалтыг цахимжуулж, тендер шалгаруулалтыг ухаалаг системээр хийх төслийг хэрэгжүүлнэ. Ингэснээр хардлага сэрдлэг дагуулж ирсэн худалдан авалт, тендер шалгаруулалтын үйл ажиллагаа шударга ил тод болж байгаа аж. 

“Эрдэнэт үйлдвэр” ТӨҮГ-ын ерөнхий захирал Г.Ёндон:

-Тендер худалдан авалт, шалгаруулалтын процесст хиймэл оюун ухаан нэвтрүүлж эхэлсэн. Үүний өмнө ЦХХХЯ, Төрийн худалдан авах ажиллагааны газар, Сангийн яам, "Эрдэнэс Монгол" нэгдэл зэрэг төрийн байгууллагуудтай хамтран ажилласан. Сангийн яамнаас төрийн худалдан авах ажиллагаанд боловсруулдаг журам бий. Журамд орчин үеийн техник технологийн дэвшлийг хэрэглэж болно гэх заалт орсон байдаг. Эрх зүйн хувьд хиймэл оюун ухаанаар цаашид тендерийг явуулахад болохгүй зүйлгүй. Хамгийн гол нь үнэлгээг хэр зэрэг хийхээс шалтгаална. Үнэлгээ найдвартай шударга явагдсан тохиолдолд маргаан гарахгүй.

Долоодугаар сарын 1-нээс хойш бүх тендерүүдийг хиймэл оюун ухаанаар үнэлж байна. Эрдэнэт үйлдвэрийн 300 гаруй ажилтан үнэлгээний хороонд орж ажилладаг. Жилд 1000 гаруй тендер зарладаг. 2025 онд TenderEval 2.0 үнэлгээний системийг дахин танилцуулна. 2026 онд "Эрдэнэс Монгол" нэгдлийн харьяа бүх компаниуд, 2027 оноос төрийн бүх худалдан авах ажиллагааг тус системээр явуулах төлөвлөгөөтэй ажиллаж байна.

“Эрдэнэт Үйлдвэрлэл, технологийн парк"-ийн бүтээн байгуулалтын ажил амжилттай өрнөж байна. Төмөр замын бүтээн байгуулалтын ажил дуусах шатандаа явж байгаа бөгөөд гүйцэтгэгч компани ажил хүлээлгэж өгөх санал ирүүлээд байна. Мөн авто замын ажил 60 гаруй хувьтай, усан хангамжийн ажил 50 хувийн биелэлттэй, цахилгаан хангамжийн ажлын тендер зарлагдсан байгаа.

“Эрдэнэт Үйлдвэрлэл, технологийн парк"-ийн техник технологийн үнэлгээ, байгаль орчны үнэлгээ зэрэг бүх шаардлагатай бичиг баримтууд хийгдээд дууссан. Бүтээн байгуулалтын ажил 2025 онд дуусна. Зэсийн баяжмал боловсруулах үйлдвэрийн гүйцэтгэгчийг сонгон шалгаруулах ажил хийгдэж байна.

“Эрдэнэт Үйлдвэрлэл, технологийн парк" үнэлэмж өндөртэй, өртөг шингэсэн катодын зэс үйлдвэрлэнэ. Зөвхөн катодын зэс үйлдвэрлээд зарахад Эрдэнэт үйлдвэрийн борлуулалтын орлого 100 сая ам.доллароор нэмэгдэх тооцоололтой байгаа гэв.

---