Үндэсний эвслийн тэргүүн Н.Номтойбаяр "Төсвийн байнгын хорооны гишүүд байнгын хорооны дарга Ц.Даваасүрэнгээ зайлуулмаар байна. Ц.Даваасүрэн төсвийн байнгын хорооны дарга байсан цагт төсвийн тодотгол хийгдэхгүй. Та Засгийн газрын БЭТ биш шүү дээ" гэх үгийг чуулганы хуралдааны танхимд хэлэв.

УИХ-ын гишүүн, Үндэсний эвслийн тэргүүн Н.Номтойбаяр:

-Улсын төсөв хэлэлцэж байх үед шууд тодотгол хийх нөхцөл байдал үүсэж байгаагүй. Монгол төрийн түүхэнд байгаагүй. Д.Амарбаясгалан дарга улс төрийн зөвшилцлөөр шийдэх хэрэгтэй гэж санаачилга гаргаад явж байгаад баярлаж байна.

Яагаад ийм нөхцөл үүссэн бэ гэхээр төсвийн ажлын хэсэг хуралдаагүй. Нэг л өдөр ажилласан. Энэ асуудал Төсвийн байнгын хорооны дарга Ц.Даваасүрэнтэй шууд холбоотой. Үндсэн хуулиар олгогдсон Их хурлын бүрэн эрх зөрчигдөөд байна. Та Засгийн газрын БЭТ бишээ. Төсөвт тодотгол хийх ажлыг хэсэг гараад оноос өмнө энэ батлагдаад явах ёстой. Ц.Даваасүрэн төсвийн байнгын хорооны дарга байсан цагт энэ бол амжилт олохгүй. Гөлөг төөрүүлж байгаа юм шиг л зүйл болно. Би тантай их хуралд олон жил сууж байна. Ажлын чинь арга барил, залийг чинь маш сайн мэднэ. МАН энэ хүн дээрээ хариуцлагын асуудлаа яримаар байна. Төсвийн байнгын хорооны гишүүд байнгын хорооны даргаа зайлуулмаар байна. Асуудалд эрүүлээр ханддаг, гишүүдийнхээ нийтлэг эрх ашгийг сонсдог. Аливаа асуудлыг хайрцаглаад, гөлөг төөрүүлж байгаа мэт явдаггүй хүнтэй бол. УИХ-ын дарга үүнийг онцгой анхаараад өгөөрэй гэв. 

---