Монгол Улсын 2025 оны төсвийн тухай хууль батлагдсантай холбогдуулан авах зарим арга хэмжээний тухай УИХ-ын тогтоолын төсөл батлагдлаа.

УИХ-ын гишүүн Х.Ганхуяг:

Төсвийн ил тод байдлыг илүү сайжруулах ёстой. Бусдаар хийж гүйцэтгүүлэх ажил гээд 1,9 их наяд төгрөг тавьсан байна. Хөрөнгө оруулалт, гэрээгээр гүйцэтгүүлэх ажил ч байж болно. Манайхан нэг том дүн тавиад, тэр мөнгөөр яг юу хийх, яаж зарцуулах нь тодорхойгүй. Хэлэлцүүлгийн явцад задарч тайлбар өгөөгүйгээс болж өнөөдөр үл ойлголцол үүсэж байна.

Төсвийн гүйцэтгэлийн аудитын тайланг хэлэлцэх явцад асар олон зөрчил илэрдэг. 2023 оны төсвийн гүйцэтгэл хэлэлцэх үед 900 гаруй тэрбум төгрөгөөр анхан шатны баримтгүйгээр худалдан авалт хийгдсэн байдаг. Тухайн асуудалд хэн ч хариуцлага хүлээгээгүй. Гишүүд төсвийг хянах ямар ч боломж байдаггүй гэлээ. 

---