Авлигатай тэмцэх газрын Мөрдөн шалгах хэлтсээс “Ногоон автобус”-ны гэх тодотголтой хэрэгт мөрдөн шалгах ажиллагаа явуулж, Нийслэлийн Прокурорын газраас шүүхэд шилжүүлээд байна. Энэ хэрэгт холбогдсон Нийслэл Улаанбаатар хотын авто замын түгжрэлийг бууруулах Үндэсний хорооны дарга асан Ж.Сүхбаатарын байр суурийг сонслоо.

Түгжрэлийг бууруулах Үндэсний хорооны дарга асан Ж.Сүхбаатар:

-Би нийтийн тээвэр хариуцсан сайд биш байхгүй юу. Түгжрэлийг бууруулах үндэсний хорооны даргаар нэг жил ажилласан. Түгжрэлийн гол асуудал нь нийтийн тээврийн салбар байсан. Нийтийн тээвэр “сөнөчихсөн” салбар байсан. Би 2022 оны есдүгээр сард сайдаар томилогдсоноос хойш нийтийн тээвэр, автобусны асуудлыг ярьсан.

Тэр үед салбараараа унасан байсан. Миний хийсэн ажил бол бодлого гаргаж чадсан байхгүй юу. Нэг зүйлийг сайн ойлгох хэрэгтэй. Нөгөө миний үед идсэн уусан гээд байгаа мөнгөөр Х.Нямбаатар даргын үед 600 автобусаа авчихсан. Хөрөнгө мөнгө завшсан асуудал байхгүй. Тухайн авбусыг авахдаа анхнаасаа шаардлагыг нь өндөр тавьсан байсан. Ногоон автобусыг 2023 онд үйлдвэрлэсэн гэдэг шинжээчийн дүгнэлт гарсан. Хуучин автобус гэж хэн ч нотлоогүй.

Би автобус хүлээн авагч биш. Бодлогыг нь гаргасан хүн. Нийт 805 авбустай болсны 705 автобусыг нь улс хүлээгээд авчихсан. Хэл ам гарсантай холбоотойгоор 100 ногоон автобусыг улс хүлээж аваагүй. Хуучин автобус эсэхийг шинжээчид тогтоодог асуудал юм. Цаг хугацааны дараа үнэн мөн нь тодорно.

---