“Эмэгтэй парламентчдын чуулган-2024” болж байна. Тус чуулганаар “Анхдугаар Үндсэн хууль батлагдсаны 100 жилд эмэгтэй парламентчдын оролцоо, манлайлал”, “Шийдвэр гаргах түвшинд эмэгтэйчүүдийн төлөөллийг нэмэгдүүлэх эрх зүйн орчны шинэчлэл” сэдэвт илтгэл танилцуулагдсан юм.  

УИХ-ын гишүүн Д.Энхтуяа:

-Үндсэн хуульд өөрчлөлт оруулснаар УИХ-ын сонгуульд өрсөлдөх эмэгтэйчүүдийн квотыг 30 хувь болгосон. 2028 онд энэ хувь 40 хувь хүрэх квотыг нэмэгдүүлэхээр тогтоож өгсөн. Өнөөдөр УИХ 32 эмэгтэй гишүүнтэй байна. Энэ нь Ази тивдээ дээгүүр орж байгаа үзүүлэлт юм. Улсын бодлого гаргах, шийдвэр гаргах түвшинд эмэгтэйчүүдийн оролцоо нэмэгдсэнээр олон асуудалд эерэг үзүүлэлтийг авчирдаг. Эмэгтэйчүүд биднээс нийгмийн шинж чанартай асуудлуудад дуу хоолойн болохыг хүссээр ирсэн. 2024 оны парламент үйл ажиллагаагаа эхлүүлснээс хойш манай эмэгтэй гишүүд өөрсдийн салбарынхаа асуудлуудыг судлаад, ажиллаад явж байна.

Миний хувьд олон жил нийгмийн салбарт ажилласан хүний хувьд ахмад настны асрамжийн асуудалд дорвитой ажил хийж, үр дүнд хүргэнэ гэж бодож байна.

2025 оны төсөв хэлэлцэгдэж байна. Бүх л салбарт ужгирсан олон асуудал байна. Үе үеийн парламентад сонгогдсон эмэгтэй гишүүд чадлаараа ажилласан гэж бодож байна. Гэхдээ орон нутгийн өөрөө удирдах байгууллагуудад эмэгтэйчүүд олноор сонгогдоосой гэж хүсэж байна. Иргэдтэйгээ тулж ажилладаг, асуудал их байдаг эдгээр нэгжүүдэд эмэгтэйчүүд олноороо байх ёстой. Улсын их хуралд эмэгтэйчүүдийн квот тавьж өгсөн шигээ орон нутгийн сонгуулийн хуульд өөрчлөлт оруулаасай гэж хүсдэг гэв. 

---