2025 оны улсын төсвийн асуудлаар УИХ-ын гишүүн Ж.Баярмаа байр сууриа илэрхийлэв. 

УИХ-ын гишүүн Ж.Баярмаа:

-Ирэх оны төсөвт гадаад томилолт 46 хувиар нэмэгдсэн. 111 тэрбум төгрөгийг улсын төсвөөс гадаадад ажиллаана гэж тавьсан байна. Зарим төсвийн ерөнхийлөн захирагчдын гадаад томилолт 100 тэрбум байсан бол 400 тэрбум болж 4.3 дахин нэмэгдсэн байна.

Өсвөр үеийнхэнд үнэгүй үзвэр үзүүлэх гэсэн төсөв мөн орж иржээ. Энэ бол бид нар социализмаас доор нийгэм рүү ухарч байна. Социализмын үед бид нэг төгрөгөөр кино, жүжиг үздэг байсан. Гэтэл одоо өсвөр үеийнхэнд үнэгүй ваучер тараах гэж байна. Энэ бол байж боломгүй зүйл энэ мөнгөө эсрэгээр нь тэр хүүхдүүдийн аав, ээжид нь ажлын байр бий болго. Эдийн засгийн өсөлтөө дэмж түүнээс биш энэ сонгуульд чиглэсэн халамжийн бодлогоо боль, төсөвт битгий суулгаа гэж хэлье.

Монгол улсад үндэсний аюулгүй байдал чухал боловч нэрийг нь барьж асар өндөр өртөгтэй 330 сая долларын өртөгтэй хиймэл дагуулыг худалдаж авах гэж байна. Энэ 330 сая долларын 25 хувь нь л нэн хөнгөлөлттэй үлдсэн 75 хувь нь арилжааны банкнаас авч байгаа зээл гэж байгаа. Арилжааны банкнаас ямар хүүтэй авах нь тодорхойгүй ийм өндөр хүүтэй, эсвэл богино хугацаатай зээл аваад интернэтийг ашиглах яг ямар тулгамдсан асуудал байна. Малчид энэ хиймэл дагуулыг хөөргөснөөр интернэттэй болно гэсэн тийм агуулга огт байхгүй гэв. 

---