Эрчим хүчний үндэсний хорооноос өнөөдөр /2024.10.30/ эрчим хүчний реформ хийх асуудлаар мэдээлэл хийв. Цахилгааны үнэ хэдэн төгрөгөөр нэмэгдэх нарийвчилсан мэдээллийн Эрчим хүчний зохицуулах хорооноос өгнө гэж салбарын сайд хэллээ.  

Эрчим хүчний сайд Б.Чойжилсүрэн:

-Сүүлийн жилүүдэд эрчим хүчний салбарт хосолсон хоёр том асуудал байна. Манай улс нэг хүнд ногдох эрчим хүчний хэрэглээ хоёр хөрштэй харьцуулахад дөрөв дахин бага байна. Ойрын 5-10 жилийн хугацаанд хэрэглээ улам өснө. Эрчим хүчний зардал 357 тэрбум төгрөг, олох нь 270 орчим тэрбум төгрөг бол алдагдал нь 80 тэрбум төгрөг байна. Урт хугацааны алдагдал 1 их наяд 800 тэрбум төгрөг байхаар байна. Эдгээр асуудлыг шийдвэрлэхийн тулд хамтарсан Засгийн газраас байгуулагдсан Эрчим хүчний үндэсний хороо реформыг хийхээр ажиллаж байна. Үнэ тарифын тухайд одоо зөвхөн өртөгт ойртуулах байдлаар л ажиллаж байна. Дараа нь төрийн өмчит компаниудыг хувьчлах асуудал ярина. Тэгэхгүй бол одоо манай салбар орлогогүй учраас хэн ч сонирхож хөрөнгө оруулахгүй байна.

Урьдчилсан тооцооллоор уул уурхайн эрчим хүчний үнийг 16 хувиар нэмж, 150 мВт хүртэлх ахуйн хэрэглээний үнийг 140 төгрөг байгааг 175 төгрөг болгохоор байна. Цахилгааны үнэ хэдэн төгрөгөөр нэмэгдэх нарийвчилсан мэдээллийн Эрчим хүчний зохицуулах хорооноос өгнө.

Эрчим хүчний үнийн нэмэгдэл инфляцад нөлөөлөх вий гэх болгоомжлол байгаа. Эрчим хүчний үнэ бол гол суурь үнүүдийн нэг. Эрчим хүчний зохицуулах хороон дээр бодогдож байгаа хувилбаруудаар тооцоод үзэхээр хамгийн ихдээ 2024 оны үлдсэн хугацаа 2025 онд инфляцыг 2.4 орчим хувь нэмэгдүүлэх байх. Энэ бол зөвхөн урьдчилсан тооцоолол. Тус тооцооллыг Эдийн засгийн хөгжлийн яам, ҮСХ, Монголбанктай хамтарч бодож гаргасан. Гэхдээ энэ тооцоолол дээр хүлээлтийн инфляц нэмэгдэхийг үгүйсгэхгүй. Өөрөөр хэлбэл, эрчим хүчний үнэ нэмэгдсэн учраас бусад бараа бүтээгдэхүүний үнэ дагаад нэмэгдэх вий гэсэн болгоомжлол байна. Энийг нуугаад хэрэггүй. Бидний л хувь тавилан, байгаа нөхцөл байдал энэ гэв. 

---