Чинболдын Отгонтуяа чөлөөт бөхийн залуучуудын дэлхийн аварга шалгаруулах тэмцээний -53 кг жинд хүрэл медаль хүртжээ.

Чөлөөт бөхийн 23 хүртэлх насны буюу залуучуудын дэлхийн аварга шалгаруулах тэмцээн Албани улсын нийслэл Тирана хотод үргэлжилж байна.

Тэмцээний гурав дахь өдөр эмэгтэй -53 кг жинд Чинболдын Отгонтуяа хүрэл медаль хүртсэн байна. Тэрээр эхний шатанд Энэтхэгийн Хансика Ламбаг 12-2, шөвгийн наймд АНУ-ын Элена Ноэллэ Ивалдиг 10-8 харьцаагаар ялжээ. Харин хагас шигшээд Японы Юү Сакамотод 4-4 харьцаагаар ялагдсан бөгөөд улмаар хүрэл медалийн төлөө Казахстаны Зэйнеп Баяановаг 12-2 харьцаагаар хожжээ.

Ч.Отгонтуяа нь Азийн АШТ-ээс алт, мөнгө, хүрэл медальтай ба насанд хүрэгчдийн УАШТ-ий алт, Монголын бүх ард түмний спортын наадмын алтан медальт тамирчин юм.

 

---