Засгийн газрын өнөөдрийн хуралдаанаар боловсролын салбартай холбоотой зургаан асуудлыг танилцуулж, дэмжүүлсэн байна.

Боловсролын сайд Б.Наранбаяр:

Өнөөдөр Монгол Улсад багшийн хомстол, ур чадварын асуудал хурцаар яригдаж байна. Засгийн газрын өнөөдрийн хуралдаанаар боловсролын салбартай холбоотой зургаан асуудлыг танилцуулсан. Тодруулбал, 

• 2010 оноос хойш багш мэргэжлээр суралцаж төгссөн ч энэ төрлийн ажлаа эрхлэхгүй байгаа 19 мянган хүн байна.
• Тэтгэвэрт гарсан багшийг бага цагаар  туслах багшаар ажиллуулах талаар танилцуулсан. Улсын хэмжээнд нийт 157 бүлэгт 44-өөс дээш дүүргэлттэй бүлгүүдэд багш нарыг авч ажиллуулах ажлыг эхлүүлж байна,
• Шинжлэх ухаан, математик, хими, физик, англи хэл, технологи зэрэг хичээлүүдэд тус мэргэжлээр гадаад, дотоодын их дээд сургуулийг амжилттай төгссөн 80 дээш хувийн үнэлгээтэй төгссөн иргэдийг урьж ажиллуулах богино хугацаанд сургах,
• Багш хүний сургалтын норм нь 7 хоногт 19 цаг байдаг. Энэ цаг нь хүрэхгүй байгаа багшийг хөрвүүлж, ижил төстэй хичээл заалгах,
• Багшаар бэлтгэгдэж байгаа дөрөвдүгээр курсийн оюутанг дадлагажигч багшаар ажиллуулах,
• Цахим сургалтыг багшийн дутагдал өндөр байдаг хичээл сургалтад илүү эрчимтэй хэрэгжүүлэх зэрэг асуудлыг танилцуулж, дэмжүүллээ.

Боловсролын салбарт хамгийн чадварлаг, мундаг хүмүүсийг тогтоохын тулд цалин сайн хангалттай байх ёстой. Яг өнөөдрийн байдлаар багшийн цалин 1.4 сая төгрөгийн үндсэн цалинтай байгаа. Үүн дээр нэмэгдэл авч байгаа. 3.8 сая төгрөгийн цалин авдаг 1000 гаруй багш байна. Сумд ажиллах багш 40 хувийн нэмэгдэл авч байгаа. Улсын дунджаар авч үзвэл Ерөнхий боловсролын сургуулийн багш 2.4 сая төгрөгийн цалинтай байгаа. Цэцэрлэгийн багш 2.3 сая төгрөгийн цалин авч байгаа. Гэхдээ багш нарын цалинг нэмэгдүүлэх асуудлыг Засгийн газрын үйл ажиллагааны хөтөлбөрт тусгагдсан. Энэ талаар үйлдвэрчний эвлэлийн холбоотой ярилцаж байгаа. Нэмэгдүүлж байж өрсөлдөх чадвар сайжирч, хамгийн сайн боловсон хүчинтэй болно гэж бодож байна гэв.

---