УИХ-ын дарга асан З.Энхболдыг АТГ-т шалгуулах хүсэлт өгч байгаа талаараа иргэн Х.Бат-ялалт мэдээлэл хийв.

Иргэн Х.Бат-ялалт:

-2024 оны зургаадугаар сарын 10-ны өдөр З.Энхболд МҮОНРТ-ээр нэвтрүүлэгт оролцох үеэрээ 2009 оны Ерөнхийлөгчийн сонгуульд нэр дэвшигч Ц.Элбэгдоржид их хэмжээний мөнгийг өөрийн биеэр аваачиж өгсөн гэж ярьсан. Сонгуулийн үеэр гэмт хэргийн ноцтой мэдээллүүдийг ярьдаг. Хууль хяналтын байгууллагууд иргэний гомдлоор биш, өөрсдөө санаачилгаараа шалгах ёстой.

2009 оны Ерөнхийлөгчийн сонгуульд нэр дэвшигч Ц.Элбэгдорж тухайн үед УИХ-ын гишүүн байсан. Уг хэргийг нэвтрүүлгийн үеэр дэлгэсэн З.Энхболд мөн УИХ-ын гишүүн, Аюулгүй байдлын байнгын хорооны дарга байсан. Төрд тангараг өргөсөн хэр нь сонгуульд ашиглах зорилгоор 500 сая төгрөгийг Б.Нямтайшираас аваад, Ц.Элбэгдоржид өгсөн гэдэг. Албан тушаалын гэмт хэрэг үйлдэгдэж, “Цагаан Суварга”-ын ордыг 500 сая төгрөгийн хариу болгож өгсөн хэмээн ярьсан. З.Энхболд өөрт огт хамааралгүй мэтээр ярьдаг. Гэтэл З.Энхболд хариуд нь 2012 онд УИХ-ын дарга болсон.

УИХ-ын гишүүн, Байнгын хорооны дарга, Ерөнхийлөгч, УИХ-ын дарга нар нь гэмт хэрэгт холбогдоод ямар ч ял шийтгэл хүлээхгүй байдаг асуудлыг хөндөж, АТГ-т шалгуулах хүсэлт өгч байна гэлээ. 

---