Нийслэлийн засаг дарга Х.Нямбаатар Х.Баттулгын хийсэн хулгай луйврын талаар өдөр бүр мэдээлэл хийнэ гэж өнгөрсөн долоо хоногт мэдэгдсэн юм. Тэгвэл тэрээр өнөөдөр "Х.Баттулга НИТХ-д өөрийн хулгайгаа хийхээр санаархаж байна. Түүний хамаарал бүхий 30 гаруй хүн нэр дэвшсэн. Х.Баттулга, З.Энхболд хоёрын Монголын төрд хийсэн маш олон нүгэлт үйлдэл байгаа. Энэ хүмүүс гадны тавиул туршуул мэтээр Монголд ажилладаг гэдгийг ХЗДХ-ийн сайдаар ажиллаж байсан хүний хувьд хариуцлагатайгаар хэлье" гэсэн юм.

Нийслэлийн засаг дарга бөгөөд Улаанбаатар хотын захирагч Х.Нямбаатар:

-Сүүлийн үед женко Х.Баттулгын хамаарал бүхий 30 гаран хүн НИТХ-д нэр дэвшиж байгаа. Өөрийнх нь туслах жолоочоос эхлээд ах, эгчийнх нь хүүхэд, шантааж хийдэг лайвчид гэх мэт нэр бүхий хүмүүс. Эдгээр нэр дэвшиж байгаа хүмүүс өнөөгийн нийслэлийн удирдлагын багийг хоёр үндсэн асуудлаар харлуулах арга хэмжээг авч байгаа. Нэгдүгээрт бордюрын мафи, нөгөөх нь Дундголыг баллачихлаа гэдэг зүйл ярина гээд төлөвлөөд явж байгаа гэж сонссон.

Женко, Зикагийн бригад өнгөрсөн арван хэдэн жилийн хугацаанд бусдыг харлуулдаг, хий сэдэв босгож ирдэг, нийгмийн сэтгэлзүй мэдээлэл багатай иргэдийн тархийг угаахдаа маш сайн. Энэ хүмүүсийн хийсэн маш олон балаг байгаа. З.Энхболд, Х.Баттулга нар нийлж 2008 онд хийх гэж байсан Гашуунсухайт Ганц мод боомтын төмөр замын хил холболтыг зогсоосон. Үр дүнд нь Монголчууд 100 гаруй их наяд төгрөг олох боломжоо алдсан. Өөрөөр хэлбэл энэ 16 жилийн хугацаанд нүүрсээ төмөр замаар тээвэрлэсэн бол бидний амьдрал өнөөдрийнхөөс нэг дахин илүү болох байсан. Эргэн сануулахад гялар уутанд элс хийж цоолж Монголын баялаг ингээд гоожих гэж байна гэдэг зүйл ярьсан. Харин үүнээс үр ашгийг нь хэн хүртсэн бэ гэвэл З.Энхболдын хамаарал бүхий Хишиг арвин гэдэг компани. Түүнийг дагасан нүүрс тээврийн компаниуд цэцэглэсэн. Энэ хүмүүсийн балгаар маш олон хүний эрдэнэт амь нас хохирсон.

Дээр нь энэ хүмүүс ажил хийж байгаа өнгөтэй өөдтэй болгоныг гоочилж, мэдээлэл муутай иргэдийн тархийг эргүүлж, харлуулдаг механизмыг бий болгосон. ХЗДХ-ийн сайд Х.Тэмүүжинг нялх амрагтай болгож харлуулах ажлыг хийсэн. М.Батчимэг гэж мундаг боловсролтой эмэгтэйг Тайваны тагнуул болгож байсан. Г.Батхүү агсныг тангаргийн буг болгож харлуулж, муулж байсан. Женко Х.Баттулга дандаа худлаа ярина, дандаа бүх ажлыг гацаана. Хар массад ихэд хайртай хүн болж харагдана.

Бордюр гэдэг сэдэв дээр маш том хэвлэлийн баг ажиллаж байна гэдэг мэдээлэл авсан. Үүр шөнийн цагаар З.Энхболд бордюр хийж байгаа газар очоод чулуун бордюрыг хагалж цохичихоод, зураг авчихаад явж байгаа гэдэг мэдээлэл байна. Энэ хүмүүс дахиж намайг юу гэж гүтгэх бол гэдэг айдас хүйдэс дунд байна. 

Х.Баттулга, З.Энхболд хоёрын Монголын төрд хийсэн маш олон нүгэлт үйлдэл байгаа. Тухайлбал Хятадууд орж ирж Монголын эрчим хүчний системийг цөлмөх гэж байна гээд Багануурын ДЦС-ын тендерийг зогсоосон. Ингээд өнөөдөр бид эрчим хүчний дутагдалд орчихоод явж байна. Ерөнхий сайд С.Баярын үед Шивээ Овоог түшиглэсэн Хятадын хөрөнгө оруулалттай 6000 мгв нүүрсний цахилгаан станц байгуулах ажлыг мөн зогсоосон. Өөрөө ямар ч тооцоо судалгаагүй төсөл эхлүүлдэг ч нэг ч дуусгасан төсөлгүй. Майдар хот, Зүүн төмөр зам, Сайншандын аж үйлдвэрийн парк боссонгүй. Энэ хүмүүс гадны тавиул туршуул мэтээр Монголд ажилладаг гэдгийг ХЗДХ-ийн сайдаар ажиллаж байсан хүний хувьд хариуцлагатайгаар хэлье.

Энэ хүмүүс зөвхөн хулгай хийдэг. Үүнийгээ хамгаалж, халхлахын тулд өөрсдийн суганы үснүүдийг НИТХ, УИХ-д оруулж ирдэг уламжлалтай. Женко хот дээр ирж хулгайгаа үргэлжлүүлье гэж байгаа юм байна. Энэ хүнтэй холбоотой олон зүйлсийг баримттайгаар хэлээд явна аа. Бордюрын бизнесээр сонгуулийн зардлаа босгож байгаа гэсэн мэдээлэл явж байна лээ. Харин бид мөнгөгүй сонгуульд оръё гэж байгаа гэсэн юм.

---