Халхын голын байлдааны ялалтын 85 жилийн ойн хүрээнд "Халхгол 85 - судалгаа, үр дүн, чиг хандлага" сэдэвт олон улсын эрдэм шинжилгээний хурал Гадаад харилцааны яамны “Зөвшилцөл” танхимд өнөөдөр боллоо.

Тус олон улсын хуралд Халхын голын байлдааны талаар судалгаа, шинжилгээ явуулдаг ОХУ, БНСУ, Монгол, Япон зэрэг орны эрдэмтэн, судлаачид оролцож, илтгэл хэлэлцүүлснээс гадна уг байлдаанд оролцсон ахмад дайчдын төлөөлөл урилгаар оролцлоо. 

Эрдэм шинжилгээний хурлаар “Халхын голын дайны түүх бичлэг”, ““Халх гол -39” түүхийг хэт нэг талыг баримтлан тайлбарлах стратеги”, “БНСУ-ын сонинд нийтлэгдсэн Халхын голын дайны тухай мэдээ, нийтлэл”, “1930-аад оны сүүл үеийн Зүүн хойд Ази ба Ххалхын голын байлдаан”, “Халхын голын дайны өмнөх алс дорнодын олон улсын харилцаа” зэрэг илтгэл, судалгааны бүтээлүүд хэлэлцэгдэж танилцуулагдлаа. 

Энэхүү хурлын зорилго нь Халхын голын байлдааны түүх, цэргийн урлагын чиглэлээр эрдэмтэн судлаачдын судалгааны ажлын үр дүнг нээлттэй хэлэлцэх, харилцан мэдлэг, мэдээлэл солилцох, цэргийн түүхийн болон цэргийн урлагийн чиглэлээр цаашид эрдэм шинжилгээ, хамтын ажиллагааг өргөжүүлэхэд оршиж буй юм. 

---