18-аас доош насны хүүхдийг суррон унаж, замын хөдөлгөөнд оролцуулахыг хориглох санал гаргалаа. Энэ талаар НЗД-ын орлогч Л.Хосбаяр, НЭМГ-ын дарга П.Эрхэмбулган нар мэдээлэл өгч байна.

НЭМГ-ы дарга П.Эрхэмбаяр:

-ГССҮТ-ийн мэдээллээр залуус, өсвөр үеийнхний дунд сурроны хэрэглээ нэмэгдсэнтэй холбоотойгоор гавал тархины эдийн гэмтэл, ясны цууралт, гар хөл буюу мөчдийн хугарал, зөөлөн эдийн хөхрөлт няцралт, цээжний хөндийн битүү гэмтэл, хэвлийн эдийн гэмтэл зонхилон тохиолдож байна.

Хоёр дугуйт тээврийн хэрэгслээс үүдэлтэй зам тээврийн осолд 2021 онд 1181 хүн өртснөөс 210 нь 0-18 насны хүүхэд байжээ. 

Тухайлбал:

• 2022 онд 1,452 хүн энэ төрлийн зам тээврийн осолд өртсөнөөс 18 хүртэлх насны хүүхэд 232, жолоодож яваад гэмтсэн хүүхэд 110
• 2023 онд 1,680 хүн энэ төрлийн зам тээврийн осолд өртсөнөөс 18 хүртэлх насны хүүхэд 317, жолоодож яваад гэмтсэн хүүхэд 235
• 2024 оны долдугаар сарын 31-ний байдлаар энэ төрлийн зам тээврийн ослын 1,233 тохиолдол бүртгэгдсэнээс 18 хүртэлх насны хүүхэд 281, жолоодож яваад зам тээврийн осолд орсон хүүхдийн тоо 238 болж өссөн байна.

Осол гэмтэлд өртсөн хүүхдүүд насан туршдаа хөдөлмөрийн чадвараа алдах гэмтлийн үр дагавар нь хүндрээд нас барах тохиолдол байдаг. Жилд энэ төрлийн 1,600-2,000 осол бүртгэгдэх хандлагатай байгаа энэ үед сурроныг насанд хүрээгүй хүүхэд жолоодож байгаатай холбоотой зохицуулалтыг зайлшгүй хийх шаардлагатай харагдаж байна гэв.

---