Солонгос Монголын хамтарсан арга хэмжээ зохион байгуулагч анхны энтертайнмент компани болох Evandis Entertainment-аас алдарт дуучин, жүжигчин Жун Жи Хун буюу Rain Улаанбаатар хотод тоглолтоо хийнэ гэж мэдээллээ.

Тус компани өмнө нь БНСУ-ын уран бүтээлчид, Монгол Улсын уран бүтээлчдийн хамтарсан "Your Valentine" олон улсын тоглолтыг зохион байгуулж байсан удаатай.

"Your Valentine" олон улсын тоглолтод 10 гаруй орчуулагчийн баг, тайзны багийн 100 гаруй ажилтан, 160 гаруй сайн дурын ажилтнууд гээд нийт 350 орчим хүн ажилласан байдаг. Тоглолт зохион байгуулагдаж дууссаны дараа Evandis Entertainment-ын зүгээс "Дараагийн тоглолт энэ удаагийнхаас илүү байна гэдгийг амлаж байна" хэмээж байсан бол энэ удаа дахин Солонгосын алдартнууд Монголд хүрэлцэн ирэх нь ээ. Тоглолт болох өдрийг албан ёсоор удахгүй мэдээлнэ. 

Түүний урлагийн нэр нь Rain буюу Солонгосоор Пи /бороо/ гэдэг байна. Дуучин, бүжигчин, жүжигчин, загвар өмсөгч, дизайнер, бизнесмэн Rain энэ амжилтад хүрэхийн тулд их хөдөлмөрлөжээ. 

Тэрбээр анх 2002 онд “KBS” телевизийн “Шинэ залуу шилдэг эрэгтэй жүжигчин” хэмээх шагналыг “Sang Doo Let’s Go School”олон ангит киноны Сан Дугийн дүрээр хүртсэн бол 2004 онд “KBS” телевизийн дээд шагналыг “Full House”буюу бидний сайн мэдэх “Миний байшин” олон ангит киногоор хүртэж байжээ. “Миний байшин” кино нь Азийн үзэгчдийг байлдан дагуулсан бөгөөд Азийн шилдэг киногоор шалгарч байсан билээ. 

---