“Парис 2024” олимпын наадамд оролцох Монголын баг тамирчдын ёслолын хувцсыг  “Michel & Amazonka” брэндийн хамт олон урласан юм. Тэгвэл Парисын олимпод оролцох Монгол тамирчдын өмсөх ёслолын хувцас ихээхэн шүүмжлэлд өртсөн юм.

"Монгол тамирчдад бус Хятад тамирчид өмсвөл зохилтой, энэхүү загвар нь манай тамирчдад зохимжгүй байна" гэх шүүмжлэлийг олон нийтийн зүгээс өнгөрсөн өдрүүдэд өрнүүлсэн. Түүнчлэн гадаадын жуулчин тус олимпын хувцсыг худалдан авч өмссөн байна гэх мэдээлэл ч цацагдсан.

Үүнтэй холбоотойгоор “Michel & Amazonka” брэнд дараах мэдээллийг гаргасан байна.

Michel & Amazonka:

-Монголын баг тамирчдын хувцас хэрэгсэл, загваруудыг дэлхийн 20 гаруй улсын хэвлэл мэдээлэл, томоохон сошиал хуудсууд, загварын шүүмжлэгчид өөрсдийн платформаар дамжуулан олон улсад сурталчлан танилцуулж, Монгол хувцас соёлоор бахархан хэлэлцүүлэг өрнүүлж, одоогоор давхардсан тоогоор 20 сая давсан хандалтыг аваад буй нь бидний хийсэн ажлын гол үр дүнгийн нэг билээ. Үүнтэй холбоотойгоор тухайн загварыг худалдан авахыг хүссэн дотоодын болон гадаадын олон зуун хэрэглэгчид бидэнд хүсэлтээ ирүүлээд байгаа ба Монголын Үндэсний Олимпын Хорооны зөвшөөрөлтэйгөөр худалдан борлуулах тусгай эрхийнхээ хүрээнд цөөн тоогоор дахин урлаж, зөвхөн захиалгаар борлуулах бэлтгэл ажилдаа ороод байна. Тухайн борлуулсан бараа бүтээгдэхүүн бүрийн үнийн дүнгийн 8%-ыг Монгол Улсын хүүхэд залууст Олимпизмыг сурталчлах, дэмжих үйлст зориулан холбогдох байгууллагуудад хандивлах болно гэжээ.

---