Пенсильвани мужийн Батлер хотод болсон сонгуулийн арга хэмжээний үеэр АНУ-ын ерөнхийлөгч асан Дональд Трамп руу гал нээжээ. Сум түүний чихийг шүргэж, тусгай албаныхан нүүлгэн шилжүүлсэн байна. 

Трампыг тайзан дээр үг хэлж эхлээд удаагүй байх үед ийм явдал болжээ. Энэ үеэр тэрбээр сонгогчид руу зангидсан нударгаа харуулан орилж байсан аж.

Арга хэмжээ дээр байсан нэг үзэгч нас барж, хоёр хүн хүнд шархадсан гэж албаны мэдэгдэлд дурджээ.

АНУ-ын тусгай албаны хэвлэлийн төлөөлөгч Энтони Гуглелми “Энэ явдал долдугаар сарын 13-ны орой Пеннсильванид болсон Трампын уулзалтын үеэр боллоо. Тусгай алба хамгаалах арга хэмжээ авсан бөгөөд ерөнхийлөгч асан эсэн мэнд байгаа. Одоо бид хэргийг мөрдөн шалгаж байна. Олдсон мэдээллийг тухай бүрд нь өгөх болно” гэж мэдэгджээ.

Трампын хэвлэлийн төлөөлөгч Стивен Чун “Ерөнхийлөгч Трамп энэхүү бусармаг үйлдлийн үеэр шуурхай арга хэмжээ авсан хууль сахиулах байгууллага болон яаралтай тусламжийн ажилтнуудад талархаж байна. Түүний биеийн байдал сайн бөгөөд орон нутгийн эмнэлэгт үзүүлж байгаа. Дэлгэрэнгүй мэдээллийг удахгүй өгөх болно” гэжээ.

 

---