МАН-ын дарга Л.Оюун-Эрдэнэ сонгуулийн үр дүнтэй холбоотой мэдээлэл хийв.

МАН-ын дарга Л.Оюун-Эрдэнэ: 

-Монгол Улсын иргэд, сонгогчид та бүхэн Монгол Улсын их хурлын ес дэх удаагийн сонгуульд маш идэвхтэй оролцож саналаа өгч, эрхээ эдэлсэнд чин сэтгэлийн талархал илэрхийлье.

Бид Үндсэн хуулийн нэмэлт өөрчлөлтөөр шинэ гучин жилийг эхлүүлэх тухай бусад намуудтайгаа зөвшилцөж тогтолцооны өөрчлөлт хийж чадсан. Парламентад хоёр намаас өөр нам, нийгмийн салбарын төлөөлөл орж ирж чаддаггүй 34 жил болсон байна. Өнөөдөр бид нар анх удаа 126 төлөөлөл бүхий шинэ парламентыг бүрдүүлж, салбар салбарын нийгмийн дуу хоолойны төлөөлөл болсон ард түмний парламент бий болж байна. 76 дарга төвтэй байсан тогтолцоо өөрчлөгдөж байна. Нутаг дэвсгэрийн төлөөллийн зарчимтай болж байна.

34 жилийн түүхэнд 5-6 намын төлөөлөлтэй парламенттай болж байна. Ардчиллын мэтгэлцээнд шинэ хуудас нээж байна гэж ойлгож болно. Үндсэн хуулийн нэмэлт өөрчлөлтийг хийсэн УИХ-ын гишүүдэд талархал илэрхийлье. Ардчилсан нам болон ХҮН намд баяр хүргэе.

Монгол ардын нам УИХ-д 68-70 суудалтай болохоор урьдчилсан тооцоолол байна. Энэ бол МАН-ын ялалт бус, ард түмний ялалт, дуу хоолой парламентад орж ирж байгаа тогтолцооны реформ. Цоо шинэ гучин жилийн эхлэл. Парламентын намууд илүү бодлогын нам болно. Үзэл баримтлалаараа мэтгэлцэнэ. Ард түмний санал гээгдэхгүй. Миний бие санал өгөх үедээ сэтгэл хангалуун байсан нь 1990 онд Монголын ард түмэн саналаа маш сайн өгч байсан. Анхдагч үнэт зүйл дээрээ эргэн ирлээ. Бүх хүмүүст талархал илэрхийлье. Бид үзэл бодлын ялгаатай зүйлдээ хүндэтгэлтэй хандахыг хүсье гэв.

---