Хан-Уул дүүргийн нутаг дэвсгэрт хүний амь нас хохироосон гэх дуудлага цагдаагийн байгууллагад энэ сарын 21-ний өдөр иржээ. Энэ талаар ЦЕГ-аас мэдээлэл хийв. 

ЦЕГ-ын УСГ-ын Хэвлэл мэдээлэл, олон нийттэй харилцах хэлтсийн дарга Г.Пүрэвдэлгэр:

-Цагдаагийн байгууллагад энэ оны зургаадугаар сарын 21-ний өдрийн 07:10 цагт Хан-Уул дүүргийн хоёрдугаар хорооны нутаг дэвсгэрт хүний амь нас хохироосон гэх мэдээлэл ирсэн.

Уг мэдээллийн дагуу Цагдаагийн Ерөнхий газрын Эрүүгийн цагдаагийн алба, Мөрдөн байцаах алба, Шүүхийн шинжилгээний ерөнхий газар, Хан-Уул, Сүхбаатар дүүргийн цагдаагийн газар, дүүргийн прокурорын газар тус тус хамтран хэргийн газарт холбогдох шалгалтын ажиллагааг явуулсан.

Мөрдөн шалгах ажиллагаагаар Чингэлтэй дүүргийн 19-р хорооны нутагт оршин суух 20 настай эрэгтэй Д нь Сүхбаатар дүүргийн нэгдүгээр хорооны нутаг дэвсгэрт 2024 оны зургаадугаар сарын 8-9-нд шилжих шөнө 32 настай эмэгтэй З-ийн амь насыг хохироосон. Мөн Хан-Уул дүүргийн хоёрдугаар хорооны нутаг дэвсгэр 2024 оны зургаадугаар сарын 20-21-нд шилжих шөнө 16 настай эмэгтэй Ш-ийн амь насыг тус тус хохироосон болох нь мөрдөн шалгах ажиллагаагаар тогтоогдож мөрдөн шалгах ажиллагаа явуулж байна.

Нийслэлийн прокурорын газраас иргэн Д-д Эрүүгийн хуулийн тусгай ангийн 10.1-р зүйлийн хоёр дахь хэсэг, 2.6-д зааснаар зааснаар эрүүгийн хэрэг үүсгэж, яллагдагчаар татсан. Хан-Уул дүүргийн шүүхээс иргэн Д-д цагдан хорих, таслан сэргийлэх арга хэмжээ авсан.

Мөрдөн шалгах ажиллагаа явуулж байгаа тул үүнээс цааш дэлгэрэнгүй мэдээлэл өгөх боломжгүй гэв

---