Баянзүрх дүүргийн Иргэний хэргийн анхан шатны шүүхийн шүүгч Б-д 2022 оны есдүгээр сард хахууль өгөхийг завдсан хуульчдад холбогдох хэргийг НПГ-ын хяналтын прокурорын бичсэн эсэргүүцлийг үндэслэн Улсын дээд шүүхэд хянасан юм. Улмаар хяналтын шатны шүүх хуралдаанаар хэлэлцүүлэхээс татгалзсан тул хээл хахуулийн хэргийн талаар анх “шүгэл үлээсэн” шүүгчийг тэдэнд холбогдох хэрэгт шалгахаар боллоо.

Баянзүрх дүүргийн Иргэний хэргийн анхан шатны шүүхийн ерөнхий шүүгчээр ажиллаж байгаад Ерөнхийлөгч Х.Баттулгын зарлигаар бүрэн эрхийг нь түдгэлзүүлсэн 17 шүүгчийн тоонд багтсан, сүүлд нь Улсын дээд шүүхийн Тамгын газрын даргын үүргийг түр орлон гүйцэтгэгчийн алба хашсан С.Амардэлгэр, өмгөөлөгч Л.Энхбат нар аж ахуйн нэгж хоорондын маргааныг нэгэн компанийнханд ашигтай шийдвэрлүүлэх зорилгоор хэргийг хянан шийдвэрлэх гэж байсан шүүгч Б-д 10 000 ам.долларын хахууль аваачиж өгсөн хэрэгт холбогдсон юм. Шүүгч Б нь уг мөнгийг авмагцаа АТГ-ынханд болсон явдлын талаар мэдэгдэж, валютыг бүгдийг нь хүлээлгэн өгчээ. Өөрөөр хэлбэл, хээл хахуулийн хэргийг сайн дураараа илчилсэн байдаг.

НПГ-аас С.Амардэлгэр, Л.Энхбат нарт Эрүүгийн хуулийн 22.5-1-ийн бусдад хахууль өгсөн гэх заалтын дагуу яллах дүгнэлт үйлдэн Баянзүрх дүүргийн Эрүүгийн хэргийн анхан шатны шүүхэд шилжүүлсэн бөгөөд тус шүүх хэлэлцэлгүй нэлээд удааширсны эцэст 2023 оны арванхоёрдугаар сарын 13-нд нэмэлт ажиллагаа хийлгэхээр прокурорын хяналтад буцаах захирамж гаргасан юм. Уг захирамжийг нь хяналтын прокурор эсэргүүцсэнийг нийслэлийн Эрүүгийн хэргийн давж заалдах шатны шүүх хэлэлцээд эсэргүүцэл үндэслэлтэй гэж дүгнэн анхан шатны шүүхийн шүүгчийн захирамжийг бүхэлд нь хэрэгсэхгүй болголоо. Гэхдээ тус захирамжид заагаагүй үндэслэл буюу Баянзүрх дүүргийн Иргэний хэргийн анхан шатны шүүхийн “шүгэл үлээсэн” шүүгч Б-г шалгуулах ёстой гэж дүгнэн прокурорын хяналтад буцаахаар шийдвэрлэсэн юм. 

---