Реппер Mr.Desant буюу С.Батболд задгай талбайн анхны бие даасан "BIG FISH" тоглолтоо зургаадугаар сарын 8-нд Төв цэнгэлдэх хүрээлэнд зохион байгуулна. Энэ талаар тоглолтын ерөнхий продюсер болон реппер Desant нар өнөөдөр хэвлэлийн хурал зохион байгууллаа.

Реппер Desant буюу С.Батболд:

-"BIG FISH" тоглолт миний гурав дахь бие даасан тоглолт. Задгай талбайд хийж буй анхны бие даасан тоглолт болж байгаагаараа онцлог. Миний анхны тоглолт 2014 онд болж байсан. Үүнээс хойш 10 жилийн дараа задгай талбайн, том хэмжээний бие даасан шоуг зохион байгуулж байна. 100 хувь хип хоп тоглолт болно.

Найруулга, тайз, хөгжим дээр манай багийнхан илүү анхаарч, энтертайнмент шоуг үзүүлэх болно. Тоглолт эхнээс дуустал зохиолоор явах болно. Миний хийсэн дуунуудаас холбож, бүтэн цогц зохиол маягаар найруулж байгаа. Надтай хамт уран бүтээл хийж байсан артистууд хамтран тоглох болно. Хоёр долоо хоногийн хугацаанд ахиад шинэ уран бүтээлүүд гарна.

Тоглолт 15:00 цагаас хаалгаа нээж, DJ нар уран бүтээлээ тавина. 18:00 цагаас залуу уран бүтээлчид тоглолтыг нээнэ. Улмаар миний 30 орчим дуу дуулагдаж, 00:00 цагт дуусах юм.

"BIG FISH" гэдэг бол миний дуу. Заримдаа гэмт хэргийн байж болох субъектийг "том загас" гэж нэрлэдэг. Гэхдээ том тоглогч гэдэг утгаар тоглолтоо нэрлэсэн.

HOOD дууг өөрийнхөө тоглолт дээр TG, Big Gee, Vanquish нартай дуулах болсондоо баяртай байна. Өмнө нь бүрэн бүрэлдэхүүнээрээ цугладаггүй байсан учраас HOOD дууг дуулж байгаагүй. Энэ дууг сонсож өссөн залуус олон бий гэлээ. 

Тус тоглолтын Ерөнхий найруулагчаар SKIN entertainment-ийн найруулагч Б.Анар, Ерөнхий продюсероор Халзаа буюу М.Даваасүрэн нар ажиллаж байгаа. Б.Анарын хувьд Улсын их баяр наадмын нээлт, хаалтын найруулагчаар ажиллаж байсан, Халзаа буюу М.Даваасүрэнгийн хувьд сүүлийн үед залуусыг хошууруулж буй "Зуны зугаа", "Triple X", "Triple X hit Awards" зэргээрээ нэрд гараад байгаа юм.

Тасалбарыг GS25 дэлгүүрийн бүх сүлжээ болон ЭНД дарж худалдан авах боломжтой.

---