УИХ-ын гишүүд хөдөө орон нутгаар явж, байнгын хороо, түр хорооны ирц хүрэхгүй хуралдаж чадахгүй байна гэж УИХ-ын дэд дарга С.Одонтуяа хэллээ. 

УИХ-ын дэд дарга С.Одонтуяа: 

-Олонхын бүлгийн дарга Д.Тогтохсүрэн УИХ-ын даргын дэргэдэх зөвлөлийн хурлаар МАН-ын олон гишүүд хөдөө ажиллаж байгаа учраас МАН-ын бүлэг хуралдах боломжгүй гэдгээ өнгөрсөн баасан гарагт мэдэгдсэн.

УИХ-ын гишүүд хөдөө орон нутгуудаар явж байгаагаас байнгын хороо, түр хорооны ирц хүрэхгүй хуралдаж чадахгүй байна. Гишүүд хөдөө орон нутагт ямар нэг ажлаар явах тохиолдол байх ч УИХ-ын тасралтгүй үйл ажиллагаа явагдаж л байх ёстой. Одоо яаралтай хэлэлцэх батлах хууль олон байна. Хуулийн хэрэгжилт, төсвийн зарцуулалтад хяналт тавих гээд хийх ажил их байна.

УИХ ын Хяналт шалгалтын тухай хуулийн төслийн талаар өнөөдрийн бүлгийн хуралдаанаар хэлэлцлээ. Өнгөрсөн хугацаанд хийсэн сонсголууд дээр зарим гэрч дуудаад ирэхгүй тохиолдол байсан. УИХ-ын сонсголыг үл хүндэтгэн ирэхгүй тохиолдолд арга хэмжээ авах асуудал олон улсад байдаг талаар гишүүд хэлж байсан. Түүнчлэн нээлттэй сонсгол зохион байгуулаад үр дүнгүй байна гэдэг асуудал байдаг. Эргээд хариуцлага тооцох асуудал байхгүй байна гэдэг шүүмжлэл байдаг. УИХ дээр энэ хууль дээр олон өөрчлөлт орно. Хэлэлцээд явах байх гэв. 

---