ЗГХЭГ-ын дарга Д.Амарбаясгалан эрүүл мэндийн салбар дахь процессын дахин инженерчлэл ба цахим шилжилт сэдвээр салбарын төлөөллүүдтэй уулзав.

Өнгөрсөн жил ХНХЯ-нд процессын дахин инженерчлэлийн шинжилгээ хийж чиг үүргийн давхцалтай 65 үйлчилгээ, сайжруулах шаардлагатай 1000 гаруй процесс байгааг тогтоожээ. Энэ хүрээнд төрийн үйлчилгээг иргэдэд хялбар болгох, холбогдох дүрэм, журмыг шинэчлэх, төрийн албан хаагчдын ажлын ачааллыг тэнцвэржүүлэх ажил өрнөж байна.

Энэ удаад эрүүл мэндийн салбарт процессын дахин инженерчлэл хийх зорилт дэвшүүлжээ. 2023 онд Засгийн газрын дэргэдэх иргэд, олон нийттэй харилцах 11 11 төвд яамдын үйл ажиллагаатай холбоотой 12 000 орчим санал, хүсэлт ирсний 23 хувийг эрүүл мэндийн салбартай холбоотой санал хүсэлт байжээ.

Эрүүл мэндийн салбарын процессын дахин инженерчлэлийн ажлыг ЭМЯ, ЦХХХЯ болон ЗГХЭГ хамтран гүйцэтгэнэ. Иргэнд ээлгүй, эмнэлэгт олон дахин биеэр ирэхийг шаардсан, бухимдал үүсгэдэг асуудлуудад цахим шийдлийг нэвтрүүлж, хуучин цагийн давхар хяналт бүхий дүрэм, журмуудыг цэгцлэх ажил үргэлжилж байна. 

---