МАН-аас бүлгийн хурлаар хэлэлцсэн асуудлын талаар мэдээлэл хийлээ.

УИХ дахь МАН-ын бүлгийн дарга Д.Тогтохсүрэн:

-Парламентын гишүүдийн тоо 126, сонгуулийн холимог тогтолцоо бий болсонтой холбогдуулаад УИХ, УИХ-ын чуулганы хуралдааны хуулиудыг өөрчлөх ажлын хэсгийг Төрийн байгуулалтын байнгын хорооны дарга Н.Энхболд ахлан ажиллаж байгаа. Ажлын хэсэг хуулийн төслийг бэлэн болгож, өнөөдөр бүлгийн хурлаар хэлэлцлээ. Ингээд зарим асуудлыг шийдвэрлэж, хуулийн төсөлд тусган УИХ-аар хэлэлцэж батлуулах шийдвэр гаргалаа.

УИХ-ын гишүүн, Төрийн байгуулалтын байнгын хорооны дарга Н.Энхболд:

-Үндсэн хуульд орсон нэмэлт өөрчлөлтүүдтэй холбоотой УИХ, УИХ-ын чуулганы хуралдааны дэгийн тухай хуульд өөрчлөлт хийх шаардлага гарсан. Учир нь дараагийн УИХ Үндсэн хуульд нийцсэн хуультайгаар ажлаа эхлүүлэх ёстой.

• УИХ-ын бүрэлдэхүүн
• УИХ-ын зохион байгуулалт бүтэц
• УИХ-ын дарга, гишүүдийн бүрэн эрхийн асуудал
• УИХ-ын гишүүний бүрэн эрхийн баталгааны асуудал
• Хууль тогтоох үйл ажиллагааны журмын талаар
• УИХ-ын Тамгын газрын чиг үүрэг
• Бусад гэсэн долоон бүлэг бүхий өөрчлөлтүүд УИХ-ын хуульд орж байна.

УИХ нэг танхим, 126 гишүүнтэй байна. Үүнд УИХ-д 95 ба түүнээс дээш гишүүд сонгогдсон бол УИХ бүрэн эрхээ хэрэгжүүлэх бүрэлдэхүүнтэйд тооцно. Сонгуулийн дүнгээр УИХ-д 64 ба түүнээс дээш суудал авсан нам эвслийг УИХ-ын олонх болох тухай хуулийн заалтыг албан ёсоор оруулж өгсөн.

УИХ-ын зохион байгуулалтын бүтцийн хувьд ажлын хэсгээс найман байнгын хороотой байхаар санал оруулсан. МАН-ын бүлгийн хуралдаанаар одоогийн байгаа байнгын хороод хэвээрээ байвал болно гэж шийдсэн. Байнгын хороод 19 хүртэлх гишүүнтэй байсныг 25 болгож байгаа. Гишүүд гурваас илүүгүй байнгын хороонд ажиллаж байгааг хоёр болгож байна. Ингээд давхардсан тоогоор 200 орчим хүн байнгын хороонд ажиллана. УИХ-д 12 суудалтай нам бүлэг байгуулах эрхтэй болно гэлээ.

---