Засгийн газар Тамхины хяналтын тухай хуулийн төслийг боловсруулж буй юм. Энэ хүрээнд ЭМЯ-ны Нийтийн эрүүл мэндийн газрын дарга Д.Баярболдоос тодрууллаа.

ЭМЯ-ны Нийтийн эрүүл мэндийн газрын дарга Д.Баярболд:

-Тамхины хэрэглээний талаарх судалгаагаар манай улсын нийт иргэдийн 20 хувь нь тамхи татдаг. Нийт тамхи татаж байгаа иргэдийн эрэгтэйчүүд эмэгтэйчүүдээсээ долоо дахин их байна. Өсвөр насны хүүхдүүдийн электрон тамхины хэрэглээ сүүлийн жилүүдэд өндөр болж эхэлсэн. 

Тамхины хяналтын тухай хуульд нэмэлт өөрчлөлт оруулах хуулийн төслийн үзэл баримтлал батлагдсан. Хуулийн төслөө эцэслэж бүх яамдаас санал авсан. Ингээд Засгийн газрын хуралдаанд оруулна.

Электрон тамхины татварыг утаат тамхитай адил хэмжээтэй авахаар тусгагдсан. Мөн тамхины татварыг үе шаттайгаар нэмэгдүүлэхээр төсөлд тусгаж өгсөн. Тус хуулийг дагаад онцгой албан татварын хуульд өөрчлөлт оруулахаар тусгагдсан. Иргэдийн саналыг D-parliament хуудсаар авсан.

Энэ хууль батлагдсаны дараа электрон тамхийг утаат тамхитай ижил түвшинд авч үзнэ. Олон нийтийн газар татахгүй байх, 21 насанд хүрээгүй хүүхдэд худалдаалахгүй зэрэг заалтууд орсон.

Тамхины хяналтын тухай хуулийн төслийг ахалж байсан хүмүүсийг дайрч доромжлох ч асуудал гарсан. Гэхдээ нийт иргэдийн эрүүл мэндийн хувьд энэ асуудлыг зайшгүй харж үзэх шаардлагатай гэдэг үүднээс энэ хуулийн төслийг өөрчлөх ёстой гэдэг байр суурьтай байна гэв. 

---